Fréttir

Mynd: Kristján Þ. Halldórsson

Vel sóttur íbúafundur var haldinn í félagsheimilinu Múla í Grímsey þann 29. júní síðastliðinn. Styrkjum í verkefninu Glæðum Grímsey á vegum Brothættra byggða var úthlutað og hlutu 10 verkefni styrk.

Sigurður Ingi Friðleifsson, framkvæmdastjóri Orkuseturs og Guðmundur H. Sigurðarson, framkvæmdastjóri Vistorku hafa unnið að því undanfarin misseri að finna hagkvæmar leiðir til raforkuframleiðslu með umhverfisvænni hætti en hingað til hefur verið gert og greindu frá niðurstöðum sínum á fundinum.

Ásthildur Sturludóttir bæjarstjóri Akureyrarbæjar kynnti fyrir fundargestum helstu niðurstöðum úr einkaviðtölum sem bæjarstjórn tók við Grímseyinga í vetur. Þar bar hæst eindreginn vilji heimamanna til þess að búa áfram í eynni og hlúa vel að byggðinni.

Umræður sköpuðust einnig um hin ýmsu mál. Verkefninu Glæðum Grímsey lýkur um áramót en mikill áhugi er fyrir því að styðja áfram við byggðina og sagði bæjarstjóri meðal annars frá viðræðum við ríkisvaldið um sértæk úrræði.