Fréttir

Í dag fer fram lokafundur aðila Erasmus+ verkefnisins INTERFACE. Skammstöfunin INTERFACE vísar til verkefnisheitisins á ensku, „Innovation and Entrepreneurship for Fragile Communities in Europe“, sem þýða mætti sem „Nýsköpun og frumkvæði í brothættum byggðarlögum í Evrópu“.

Fundurinn fer fram í höfuðstöðvum Byggðastofnunar á Sauðárkróki í dag, miðvikudaginn 19. júní. Verkefnisaðilar Íslands eru Byggðastofnun og Háskólinn á Bifröst, frá Írlandi er Tipperary County Council, frá Búlgaríu er Tora Consult Ltd., frá Ítalíu er CESIE og frá Grikklandi er Aitoliki Development Agency.

INTERFACE verkefnið miðar að því að valdefla íbúa brothættra byggðarlaga með það að markmiði að auka nýsköpunar- og frumkvöðlastarf í byggðarlögunum.  Þátttaka íbúa í hvers kyns byggðaþróunarverkefnum er lykilatriði. Bæði hefur það sýnt sig að slíkt starf eflir samfélagsvitund þeirra sem taka þátt, en einnig felast mikil verðmæti í þekkingu íbúanna á sérstöðu, innviðum og tækifærum sinnar heimabyggðar. Verkefnið byggir á þarfagreiningu sem unnin var innan þátttökubyggðarlaganna. Þjálfun íbúa byggir einnig að hluta á aðferðum markþjálfunar. Íbúar öðlast færni til að vinna með og virkja aðra íbúa samfélags til framþróunar þess og skipulögðu þau vinnustofur í sínum byggðarlögum þar sem unnið var að einhvers konar samfélagsþróun.

Á morgun, 20. júní verður lokaráðstefna verkefnisins haldin í Ljósheimum við Sauðárkrók. Ráðstefnan hefst með léttum málsverði kl 12 og stendur til rúmlega 16:30. Við hvetjum alla sem hafa áhuga á framþróun í sínu byggðarlagi og sér í lagi endurmenntun íbúa, að mæta á fundinn, fræðast um málefni annarra landa og taka þátt í umræðum.