Fréttir

Hafnarsvæðið í Grímsey

Ákveðið hefur verið að fresta íbúaþingi sem halda átti í Grímsey annað kvöld, eða föstudaginn 19. febrúar og laugardag, þann tuttugasta. Þessi ákvörðun var tekin í ljósi afleitrar veðurspár fyrir næstu daga. Óvíst er hvort hægt verður að fljúga út í Grímsey á morgun, föstudag og eftir það bendir spáin til þess að ekki verði hægt að fljúga til baka fyrr en jafnvel á þriðjudag.

Okkur á Byggðastofnun þykir afar leitt að þurfa að fresta þinginu, en þótti ekki annað fært en að fara þessa leið. Verkefnisstjórnin ætlar þó engan veginn að láta deigan síga og gera þriðju tilraunina til að halda íbúaþingið, en reynir að semja við veðurguðina og kannski að hafa ferjuferðirnar í bakhöndinni. Tilkynnt verður um nýja tímasetningu íbúaþingsins um leið og hún er ljós.