Fréttir

Fjölsótt var á íbúaþingi á Borgarfirði eystri

Borgarfjörður eystri hefur fjölmarga möguleika til að þar megi efla byggð til framtíðar, byggða á fjölbreyttri atvinnustarfsemi í hefðbundnum atvinnugreinum og nýsköpun út frá styrkleikum byggðarlagsins, meðal annars náttúru, sögu og mannauði.

Þetta kom fram á íbúaþingi sem haldið var helgina 10. – 11. febrúar í Fjarðarborg. Mæting var mjög góð og létu heimamn og brottfluttir veðurfarið ekki aftra sér. Íbúaþingið markar upphaf að verkefni Byggðastofnunar, Brothættum byggðum, á Borgarfirði eystra í samstarfi við Borgarfjarðarhrepp, Samband sveitarfélaga á Austurlandi, Austurbrú og íbúa Borgarfjarðar.  Íbúar gáfu verkefninu heitið „Betri Borgarfjörður“.

Á þinginu voru ræddir málaflokkar, málefni og einstök verkefni sem þátttakendur völdu og í lok þingsins forgangsröðuðu íbúar umræðuefnum. Það sem hæst skoraði í forgangsröðun er verslun og þjónusta, en ekki hefur verið starfrækt verslun á Borgarfirði undanfarna mánuði. Af öðrum málefnum sem fengu mjög mörg stig má nefna húsnæðismál, samgöngumál og fjarskipti og atvinnumál. Þá komu fram fjölmargar hugmyndir að verkefnum sem áhugavert verður að vinna að í verkefninu Betri Borgarfjörður.

Borgfirðingar eiga sér þann draum að rennt verði styrkari stoðum undir heilsársatvinnu og vilja gera enn meira úr því sem þegar er til staðar, s.s. með aukinni matvælavinnslu bæði í fiski og kjöti og fleiri afþreyingarmöguleikum fyrir ferðamenn. Þátttakendur voru meðvitaðir um að það eru íbúarnir sjálfir sem skapa samfélagið og ræddu m.a. um hvernig efla mætti félagsstarf. Þá var rætt um brottflutta sem auðlind, en 60% húsnæðis á Borgarfirði eystri er í eigu fólks sem ekki hefur fasta búsetu í sveitarfélaginu.

Þinginu var stýrt af Sigurborgu Kr. Hannesdóttur hjá ILDI og mun hún nú vinna að samantekt úr skilaboðum þingsins. Verkefnisstjórn mun á grundvelli stöðugreiningar og skilaboða frá íbúaþingi móta verkefnisáætlun með framtíðarsýn og markmiðum fyrir byggðaþróunarverkefni sem staðið getur í allt að fjögur ár.  

Það var eftirminnileg stund í lok þings, þegar þátttakendur sungu saman ljóð Borgfirðingsins Sigurðar Ó. Pálssonar, „Nú kemur vorið“, við lag Færeyingsins Birnis Dan. Þá varð hún næstum áþreifanleg, tryggð íbúa og brottfluttra gagnvart heimabyggðinni Borgarfirði eystri.