Fréttir

Stofnunin hefur nú hafið útgreiðslu styrkja til ríkisstofnana sem færa stöðugildi frá höfuðborgarsvæðinu í landsbyggðirnar.  Er þetta gert af fjármagni úr gildandi byggðaáætlun með það að markmiði að fjölga ríkisstörfum í byggðum landsins, enda er hlutfall slíkra starfa af íbúafjölda langhæst á höfuðborgarsvæðinu.  Þegar þetta er skrifað hafa störf verið flutt frá höfuðborgarsvæðinu á Neskaupstað, Húsavík, Hvammstanga, Suðurnesjabæ, Stykkishólm, Ísafjörð og Akureyri.

Þessu til viðbótar er fyrirhugað að stutt verði við uppbyggingu starfsaðstöðu til óstaðbundinna starfa um land allt á þessu ári, einnig með styrkjum úr byggðaáætlun.

Óstaðbundin störf eru eitt stærsta byggðamál síðustu ára og mun stofnunin róa öllum árum að því að efla framgang þeirra áfram, ekki eingöngu með útdeilingu styrkja og eftir atvikum lánveitingum heldur einnig með stöðugri uppfærslu mælaborða um staðsetningu ríkisstarfa annars vegar og lausra fjarvinnustöðva um land allt hins vegar. Auk þessa hefur stofnunin sjálf riðið á vaðið með góðu fordæmi en um fimmtungur starfsmanna hennar eru þegar staðsettir utan höfuðstöðva hennar sem þó eru á Sauðárkróki. 

Mörgum störfum er vissulega ekki hægt að sinna óstaðbundið en mikil tækifæri liggja í þeim störfum þar sem slíkt er mögulegt fyrir hinar dreifðu byggðir. Þannig má dreifa landsmönnum betur um landið sem er okkur öllum til hagsbóta.    

Arnar Már Elíasson, forstjóri Byggðastofnunar