Fréttir

Tvö ný tilraunaverkefni eru í þann mund að hefjast í fyrrum þátttökubyggðarlögum Brothættra byggða. Um er að ræða ný tilraunaverkefni sem líta má á sem nokkurs konar framhald á verkefnunum Raufarhöfn og framtíðin og Öxarfjörður í sókn. Samningar hafa verið undirritaðir á milli Byggðastofnunar, Norðurþings og Sambands sveitarfélaga á Norðurlandi eystra (SSNE) til þriggja ára um hvort verkefni fyrir sig. Verkefnin hafa fengið vinnuheitin Raufarhöfn og framtíðin II og Öxarfjörður í sókn II.

Verkefnisstjórn

Ákveðið hefur verið að ein verkefnisstjórn verði starfandi þrátt fyrir að verkefnin séu tvö. Vonir standa til að slík ráðstöfun efli samstöðu og samstarf á svæðinu í heild auk þess sem það gefur tækifæri til ákveðinnar hagræðingar. Verkefnisstjórn hefur þegar tekið til starfa og í undirbúningi er að kynna verkefnið fyrir íbúum og hvetja þá til virkrar þátttöku. Til stendur að senda út viðhorfakönnun til íbúa í upphafi verkefnis og leggja sambærilega könnun fyrir að þremur árum liðnum við lok samningstíma. Tilgangurinn er að varpa ljósi á hver mögulegur árangur gæti orðið af verkefninu. Fljótlega er gert ráð fyrir að opnað verði fyrir umsóknir í Frumkvæðissjóði byggðarlaganna tveggja. Þar mun íbúum gefast tækifæri til að sækja um styrki fyrir hvers kyns frumkvæðisverkefni.

Aðdragandinn að nýjum tilraunaverkefnum

Stjórn Byggðastofnunar samþykkti sl. haust að veita viðbótarfjárframlagi inn í verkefnið Brothættar byggðir til þriggja ára. Tilgangurinn er að auka viðspyrnu í byggðarlögum sem eiga á brattann að sækja. Með auknum fjármunum hefur m.a. skapast tækifæri til að lengja samninga í grunnverkefnum Brothættra byggða um eitt ár, úr fjórum árum í fimm. Einnig verður stórum hluta fjármunanna varið í fyrrnefnd tilraunaverkefni í þeim tilgangi að fylgja eftir þeim árangri sem náðist á verkefnistíma byggðaþróunarverkefnanna á sínum tíma og til að stuðla að áframhaldandi frumkvæði íbúa til eflingar samfélaganna.

Verkefnisstjórar

Verkefnisstjórar sem sinna munu verkefnunum hyggjast vinna þétt saman að eflingu samfélaganna og skipta með sér verkum.  Verkefnisstjóri í tilraunaverkefninu á Raufarhöfn, Raufarhöfn og framtíðin II, er Nanna Steina Höskuldsdóttir sem jafnframt er starfsmaður hjá SSNE og Norðurþingi. Nanna hefur starfað sem atvinnu- og samfélagsfulltrúi á Raufarhöfn frá árinu 2016. Verkefnisstjóri í tilraunaverkefninu í Öxarfjarðarhéraði, Öxarfjörður í sókn II, er Einar Ingi Einarsson en hann hefur starfað sem atvinnu- og samfélagsfulltrúi síðan árið 2024 hjá Norðurþingi. Hægt er að hafa samband við verkefnisstjóra með því að senda tölvupóst á eftirfarandi netföng  nanna@ssne.is og einar@nordurthing.is

Verkefnisstjórn skipa:

Guðmundur Baldvin Guðmundsson, fulltrúi Norðurþings og formaður verkefnisstjórnar

Olga Friðriksdóttir, fulltrúi íbúa Raufarhafnar

Ólafur Gísli Agnarsson, fulltrúi íbúa Raufarhafnar

Charlotta V. Englund, fulltrúi íbúa Öxarfjarðarhéraðs

Thomas Helmig, fulltrúi íbúa Öxarfjarðarhéraðs

Hildur Halldórsdóttir, fulltrúi SSNE

Helga Harðardóttir, fulltrúi Byggðastofnunar

Kristján Þ. Halldórsson, fulltrúi Byggðastofnunar

 

Frá íbúafundi á Raufarhöfn í janúar árið 2018

 

Frá íbúafundi í Öxarfjarðarhéraði í janúar árið 2019.