Fréttir

Verkefnið Brothættar byggðir tekur nú til sjö svæða á landinu. Á hverju svæði hafa verið veittir styrkir til þróunarverkefna og annarra samfélagseflandi verkefna. Tekið er mið af því að þau séu í samræmi við þær áherslur sem íbúarnir hafa sjálfir lagt á íbúaþingum sem haldin voru á öllum svæðunum í upphafi verkefnistímans og stefnumótun verkefnanna. Styrkir eru veittir árlega og hafa þegar verið styrkt 45 verkefni á sex af svæðunum. Alls hafa verið veittar 57 mkr. í styrki fram til þessa.

Ekki hafa enn verið veittir styrkir á vegum Brothættra byggða í Öxarfjarðarhéraði, en þess má þó vænta með haustinu. Verið er að afgreiða styrkumsóknir í verkefninu á Bíldudal og mun það liggja ljóst fyrir á næstu dögum. Í Grímsey er styrkfjármunum ársins að stærstum hluta varið til úrbóta á fjarskiptasambandi.

Nokkur dæmi um verkefni sem hafa hlotið styrk:

•  Samfélagsmiðstöð á Bíldudal: Sameiginleg menningarmiðstöð, þar sem íbúar geta komið saman til hinna ýmsu verkefna. Flytja bókasafn Bíldudals í Skrímslasafnið og búa hlýlegt að gott umhverfi með betra aðgengi fyrir eldri borgara og nýtist sem nokkurs konar samfélagsmiðstöð þar sem hægt er að koma saman í smærri eða stærri hópum. Aðstaða fyrir námsmenn til að læra og stunda fjarnám.
•  Upplýsingamiðstöð á Breiðdalsvík: Fjöldi ferðamanna kemur til Breiðdalsvíkur. Rekstur upplýsingamiðstöðvar er mikilvægur fyrir ferðamenn og atvinnufyrirtækin í ferðamennsku, en ekki síður íbúa. Verður reynslan notuð í framtíðinni við frekari markaðssetningu og stefnumótun.
•  Útivistar- og umhverfisfræðsla í Kirkjubæjarskóla: Fræðsla fyrir nemendur sem búa rétt við þjóðgarð. Nemendum er kennt að njóta útiveru, fá þjálfun í notkun áttavita og staðsetningartækni o.fl. og farnar ferðir.
•  Raufarhöfn á gullaldarárunum: Gera á tólf söguskilti um Raufarhöfn ásamt því að vinna að vídeóverkum þeim tengdum. Skiltin verða í mánaðarröð og lýsa markverðum hlutum er gerðust á svæðinu í hverjum mánuði fyrir sig. Skiltin verða hluti af stærri sýningu ef vel tekst til.
•  Þurrkun náttúruafurða í Hrísey: Tilraunaverkefni, frumhönnun og smíði á sérhæfðum tækjum til þurrkunar á lífrænum náttúruafurðum. Verkefnið nýtir sér sérstöðu Hríseyjar, nýtir náttúruafurðir eyjarinnar og er atvinnuskapandi.