Fréttir

Viljirðu setja fram tillögu í byggðaáætlun 2017-2023 sem nú er í mótun er það hægt hér á heimasíðu Byggðastofnunar, undir BYGGÐAÁÆTLUN. Tillögur sem gerðar verða í tillöguformið verða lagðar fyrir verkefnisstjórn byggðaáætlunar og hún tekur afstöðu til þeirra. Á þessu svæði heimasíðunnar er líka að finna upplýsingar um áætlunarvinnuna, fyrri byggðaáætlanir og sóknaráætlanir landshluta. Eftir því sem efni verður til, tengt byggðaáætlun, mun það verða lagt þarna inn.

Tillaga að nýrri byggðaáætlun á að liggja fyrir í atvinnuvega- og nýsköpunarráðuneytinu 1. nóvember og ráðherra mun síðan leggja fram þingsályktunartillögu fyrir Alþingi. Í nýjum lögum um byggðaáætlun og sóknaráætlanir er mælt fyrir um að Byggðastofnun skuli vinna áætlunina í umboði ráðherra, áætlunin skuli ná til sjö ára, í stað fjögurra ára áður, ná til landsins alls og mótast í samráði við sveitarfélög, landshlutasamtök þeirra, ráðuneytin og stýrihóp Stjórnarráðsins um byggðamál. Í þessu samráði er stýrihópur Stjórnarráðsins um byggðamál sem nýju lögin kveða á um mikilvægur með fulltrúa allra ráðuneyta og tengir sóknaráætlanir landshluta og áætlanir ráðuneytanna.

Vegna áherslu nýju laganna um samráð gekkst Byggðastofnun á vormánuðum fyrir fundum um byggðaáætlunina í samráðsvettvöngum landshlutasamtaka sveitarfélaga og í ráðuneytunum og stefnir að annarri slíkri fundarhrinu með haustinu. Helstu fundagögn og stutt samantekt af samráðsfundunum er á heimasíðunni undir Samráðsfundir. Skipuð hefur verið verkefnisstjórn og sérstakt ráðgjafarráð og skipan þeirra og skipurit er undir Verkáætlanir.