Fréttir

Trygg atvinna, góð þjónusta, öflugt mannlíf, sterkir innviðir, heillandi umhverfi, áhugaverður áningarstaður. Öll þessi atriði koma fyrir í meginmarkmiðum verkefnisins Brothættra byggða í fimm byggðarlögum af sex sem nú taka hafa þátt í verkefninu. Íbúar þessara byggðarlaga hafa ásamt verkefnisstjóra og verkefnisstjórnum samþykkt megináherslur í verkefninu og sett fram framtíðarsýn og markmið fyrir sína heimabyggð.

Framtíðarsýn og markmið fyrir verkefnin á Raufarhöfn, Öxarfjarðarhéraði, Breiðdalshreppi, Skaftárhreppi og Hrísey er nú tilbúin og hefur verið kynnt í ráðuneyti byggðamála. Verið er að leggja lokahönd á slíka vinnu fyrir Grímsey.

Auk þess að kynna framtíðarsýn og setja fram meginmarkmið, sem alla jafna eru þrjú til fjögur talsins, eru undir hverju meginmarkmiði sett fram nokkur starfsmarkmið. Þau eru tímasett og fram kemur hverjir bera ábyrgð á framkvæmd þeirra. Þessi skjöl eru lifandi, sem sagt þau eru sífellt í vinnslu. Á hverjum íbúafundi gerir verkefnastjóri grein fyrir stöðu markmiða og íbúar geta komið sjónarmiðum sínum á framfæri, t.d. bætt við starfsmarkmiðum eða breytt öðrum. Ætlunin með þessu verklagi er að stuðla að sameiginlegri sýn íbúa og annarra sem að málefnum byggðarlaganna koma á helstu viðfangsefni og næstu skref, þannig að allir rói í sömu átt.

Hér má sjá stefnumótunarskjölin fyrir byggðarlögin fimm:

• Breiðdælingar móta framtíðina
• Hrísey - perla Eyjafjarðar
• Raufarhöfn og framtíðin
• Skaftárhreppur til framtíðar
• Öxarfjörður í sókn