Fréttir

Fyrir nokkru síðan lögðu starfsmenn Byggðastofnunar, ásamt fulltrúum Fjarðabyggðar, leið sína í Breiðdalinn í því skyni að afhenda Hákoni Hanssyni Landstólpann, samfélagsviðurkenningu Byggðastofnunar. Hákon er vel að þessum samfélagsverðlaunum kominn eins og fram kom í frétt á vef Byggðstofnunar 23. mars sl. og hefur meðal annars leitt verkefnið Breiðdælingar móta framtíðina í Brothættum byggðum.

Hákon hefur ekki sleppt hendi af málefnum Breiðdals og tók vel beiðni ferðalanganna um að fá kynningu á fróðlegum viðfangsefnum í vinnslu sem höfðu meðal annars hlotið stuðning úr verkefninu Breiðdælingar móta framtíðina. Byggðastofnun lauk þátttöku sinni í verkefninu í upphafi árs 2019 og því áhugavert að sjá hver framvinda hefur verið á síðustu misserum.

Hákon hóf skoðunarferð með kynningu á Breiðdalssetri og starfsemi þess. Setrið er í einu elsta og virðulegasta húsi Breiðdalsvíkur og hafði á sínum tíma verið naumlega bjargað frá niðurrifi af vöskum íbúum staðarins. Í setrinu hefur farið fram metnaðarfull starfsemi og þar eru einkar fróðlegar sýningar. Nú hafa orðið þau tímamót að stofnað hefur verið háskólasetur í Breiðdalssetri með störf sérfræðinga í jarðvísindum og íslensku.

Elís Pétur Elísson fræddi gestina um Kaupfjelagið, Goðaborg fiskvinnslu, Gullrúnu ehf og Beljanda Brugghús. Í Kaupfjelaginu geta gestir og gangandi bæði keypt helstu nauðsynjavörur og fengið sér mat og/eða kaffiveitingar. Í Goðaborg gafst gestum færi á að kynna sér verkun harðfisks og smakka hann. Harðfiskurinn er afbragðsgóður. Í Beljanda Brugghúsi er ölstofa og þar er bjór seldur á krana. Hann er einnig seldur til veitingahúsa víða um land. Hjá Beljanda er meðal annars áformað að geyma bjór í ámum til að skerpa á bragði.

Að síðustu kynntu hjónin Ingólfur Finnsson og Helga Hrönn Melsteð starfsemi Bifreiðaverkstæðis Sigursteins og ferðaþjónustu undir merkjum Tinna Adventure fyrir gestunum. Veirufaraldur hefur sett strik í reikninginn í ferðaþjónustunni en þau horfa bjartsýn til framtíðar, enda hafa þau á fáum árum byggt upp gæðafyrirtæki og getið sér gott orð í ferðum sínum. Í leiðinni litu gestirnir inn í veislusal Frystihússins.

Að lokum var Hákon kvaddur með veglegum veitingum á Hamri – kaffihúsi á Breiðdalsvík.

Greinilegt er að Breiðdælingar halda áfram að móta framtíð byggðarlagsins af miklu kappi og frá 2019 með sterku baklandi í Fjarðabyggð.