Fréttir

Breytingar í ferðaþjónustu 2008-2018

Heildaratvinnutekjur á árinu 2018 námu 1.316 milljörðum kr. sem var aukning um tæplega 64 milljarða kr. frá árinu 2017 eða sem nemur 4,9%. Frá 2008 hafa atvinnutekjur á landinu öllu aukist um 256 milljarða kr. eða um 24%. Mest aukning á tímabilinu 2008-2018 var í greinum tengdum ferðaþjónustu. Það er í flutningum og geymslum um 49 milljarða kr. (84%), gistingu og veitingum um 38,5 milljarða kr. (151%) og í leigu og sérhæfðri þjónustu um 33 milljarða kr. (130%). Samdráttur varð í tveimur greinum, fjármála- og vátryggingastarfsemi þar sem atvinnutekjur á tímabilinu 2008-2018 lækkuðu um 26 milljarða kr. (-29%) og í fiskveiðum um 6,6 milljarða kr. (-13%).

Mikill munur er á þróun heildaratvinnutekna eftir greinum og svæðum. Sem dæmi má nefna að á tímabilinu 2008-2012 lækkuðu heildaratvinnutekjur alls staðar nema í Vestmannaeyjum þar sem þær jukust um ríflega 12%. Minnst varð lækkunin á svæðum sem byggja mikið á sjávarútvegi, en það voru Grindavík, Snæfellsnes og Skaftafellssýslur. Á tímabilinu 2012-2018 hækkuðu heildaratvinnutekjur hins vegar á öllum svæðum. Minnst í Vestmannaeyjum um 0,5% en mest í Reykjanesbæ þar sem þær tvöfölduðust á tímabilinu.

Í skýrslunni er einnig að finna skiptingu atvinnutekna í einstökum atvinnugreinum eftir landshlutum og atvinnugreinasvæðum. Farin var sú leið í skýrslunni að í stað þess að vera með mikinn texta eru tölulegar upplýsingar birtar á myndrænu formi. 

Skýrsluna Atvinnutekjur 2008-2018 eftir atvinnugreinum og landshlutum má finna á þessari slóð.