Fréttir

Hluti styrkþega og verkefnisstjórnar

Sjö milljónum króna úr verkefninu Áfram Árneshreppur! hefur verið úthlutað til átta samfélagseflandi verkefna í Árneshreppi. Verkefnisstjórnin fundaði í Árneshreppi 27. júní og sóttu nokkra styrkþega heim.

Dagurinn byrjaði á Hótel Djúpavík þar sem verkefnisstjórn fékk kynningu á verkefninu "Afþreyingartengd ferðaþjónusta í Árneshrepp" sem miðar að því að setja á stokk einstaklingsmiðaðar gönguleiðsagnir um Árneshrepp. Einnig var verkefnið "Í nýju ljósi" borið augum en það verkefni er komið af stað og miðar að því að endurnýja lýsingar í Sögusýningunni í síldarverksmiðjunni í Djúpavík. 

Næst var Badda Fossdal á Melum sótt heim og bauð hún verkefnisstjórninni upp á heimalagaðar kleinur og kaffi og sagði frá stöð verkefnisins "Kjötvinnsla". Verkefnið miðar að því að þróa kjötafurðir úr Árneshreppi og er nú unnið að þróun viðskiptaáætlunar og hönnunar. 

Þar næst var kíkt inn í Kaupfélagið en Ólafur Valsson fékk styrk til þess að útvíkka núverandi verslunarrekstur og draga úr rekstrarkostnaði heilsársverslunar með það að markmiði að starfandi yrði heilsársverslun í Árneshreppi. 

Að lokum fékk hópurinn sér dýrindis kaffiveitingar á Kaffi Norðurfirði þar sem Elín Agla Briem kynnti verkefni sitt, "Þjóðmenningarskólinn Ströndum Norður" sem miðar að því að efla námsskeiðshald í Árneshreppi m.a. með kaupum á færanlegu tjaldi sem nýta á sem námskeiðsaðstöðu.

Í eftirfarandi yfirliti er hægt að sjá alla styrki sem veittir voru.

Verkefnið Brothættar byggðir miðar að víðtæku samráði og því að virkja þekkingu og getu íbúa byggðarlaga til að móta framtíðarsýn, markmið og lausnir. Enn fremur að virkja frumkvæði og samtakamátt íbúa og auka vitund þeirra um eigin þátt í þróun samfélagsins.

Nánari upplýsingar veitir Skúli Gautason (skuli@vestfirdir.is) verkefnastjóri verkefnisins.