Fréttir

Byggðastofnun í samstarfi við landshlutasamtökin, HMS, Samtök iðnaðarins og Háskóla-, iðnaðar- og nýsköpunarráðuneytið hefur nú lokið fundaherferð sinni um landið. Haldnir voru átta fundir víða um land, á Sauðárkróki, Húsavík, Borgarnesi, Selfossi, Ísafirði, Hornafirði, Egilsstöðum og Reykjanesbæ.

Vel var mætt á fundina og sköpuðust góðar umræður á þeim öllum en ljóst er að bæði tækifæri og áskoranir eru fjölbreytt víða um land.

Starfsmenn Byggðastofnunar kynntu starfsemi stofnunarinnar sem og þá lánaflokka sem nýst geta til uppbyggingar í landsbyggðunum. Aðsókn í lán hjá Byggðastofnun er misjöfn eftir landssvæðum en fram kom hjá fundargestum að lánastarfsemi stofnunarinnar er gífurlega mikilvæg til uppbyggingar á atvinnustarfsemi í öllum landshlutum.

Landshlutasamtökin á hverjum stað fjölluðu um hlutverk og markmið sín. Gríðarleg vöntun er á íbúðarhúsnæði í öllum landshlutum sem aftrar frekari atvinnuuppbyggingu og ljóst að tækifæri eru til staðar til uppbyggingar á landinu öllu.

HMS kynnti niðurstöður nýjustu talningar íbúða í byggingu og hvernig sú niðurstaða fellur að húsnæðisáætlunum sveitafélaga þar sem fram kemur að fara þurfi í mikla uppbyggingu ef áætlanir eigi að nást. Fjallað var um hvaða úrræði eru í boði hjá stofnuninni fyrir húsbyggjendur og þá voru drög að nýrri mannvirkjaskrá kynnt til sögunnar. Mannvirkjaskránni er ætlað að einfalda ferlið verulega með það að markmiði að auka skilvirkni með notendavænni umsóknarferlum, bættri þjónustu, einfaldari stjórnsýslu og samræmdara verklagi.

Fulltrúi HVIN kynnti Lóu-nýsköpunarstyrki, hvert hlutverk styrkjanna er, hverjir geta sótt í sjóðinn og hvernig skal standa að því að sækja um. Í kynningunni kom meðal annars fram að lykillinn að bættum lífsgæðum og fleiri tækifærum er að hugvitið verði stærsta útflutningsgrein þjóðarinnar. Upplýst var að tæp 200 verkefni hafi nú þegar fengið styrk úr Lóu á árunum 2022 og 2023.

Við þökkum landshlutasamtökunum, HMS, Samtökum iðnaðararins og HVIN fyrir gott samstarf sem og öllum þeim fundargestum sem sóttu fundina.

Glærur Byggðastofnunar má finna hér.