Fréttir

Árshlutareikningur Byggðastofnunar fyrir tímabilið janúar-júní 2020, var staðfestur af stjórn stofnunarinnar 28. ágúst 2020.

Tap tímabilsins nam 76,9 milljónum króna.  Eiginfjárhlutfall í lok júní skv. eiginfjárákvæðum laga nr. 161/2002 um fjármálafyrirtæki var 20,0%.

Um stofnunina gilda lög um Byggðastofnun nr. 106/1999 og reglugerð nr. 347/2000. Hlutverk Byggðastofnunar er að efla byggð og atvinnulíf með sérstakri áherslu á jöfnun tækifæra allra landsmanna til atvinnu og búsetu. Í samræmi við hlutverk sitt undirbýr, skipuleggur og fjármagnar stofnunin verkefni og veitir lán með það að markmiði að treysta byggð, efla atvinnu og stuðla að nýsköpun í atvinnulífi. Fjármögnun verkefna skal eftir föngum vera í samstarfi við aðra. Stofnunin skipuleggur og vinnur að atvinnuráðgjöf í samstarfi við atvinnuþróunarfélög, sveitarfélög og aðra haghafa.  Byggðastofnun fylgist með þróun byggðar í landinu, m.a. með gagnasöfnun og rannsóknum. Stofnunin getur gert eða látið gera áætlanir um þróun byggðar og atvinnulífs í þeim tilgangi að treysta búsetu og atvinnu í byggðum landsins.

Helstu niðurstöður úr árshlutareikningi Byggðastofnunar janúar-júní 2020

• Tap tímabilsins nam 76,9 milljónum króna.
• Eiginfjárhlutfall skv. lögum um fjármálafyrirtæki var 20,0% en skal að lágmarki vera 8% auk 2,5% verndunarauka, eða samtals 10,50%.
• Hreinar vaxtatekjur voru 265 milljónir króna eða 41,8% af vaxtatekjum, samanborið við 253 milljónir króna (41,5% af vaxtatekjum) hreinar vaxtatekjur árið 2019.
• Laun og annar rekstrarkostnaður nam 276,7 milljónum króna samanborið við 288,4 milljónir árið 2019.
• Eignir námu 18.852 milljónum króna og hafa hækkað um 2.376 milljónir frá árslokum 2019.  Þar af voru útlán 15.796 milljónir samanborið við 13.039 milljónir í lok árs 2019.
• Skuldir námu 15.712 milljónum króna og hækkuðu um 2.453 milljónir frá árslokum 2019.

Horfur

Eiginfjárstaða stofnunarinnar er áfram sterk og gefur henni færi á að vera öflugur bakhjarl fyrirtækja á landsbyggðinni.

Áhrif COVID-19 á rekstur Byggðastofnunar hafa að mestu komið fram í fjölda beiðna um frestun greiðslna á lánum viðskiptavina hennar.  Stofnunin er þátttakandi í samkomulagi viðskiptabanka, lánastofnana og lífeyrissjóða um tímabundna greiðslufresti á lánum fyrirtækja vegna heimsfaraldurs COVID-19 og gildir það til 30. september 2020. Það felur í sér að greiðslufrestir vegna áhrifa COVID-19 verði veittir til áramóta að hámarki.

Nánari upplýsingar

Nánari upplýsingar veitir Aðalsteinn Þorsteinsson, forstjóri Byggðastofnunar í síma 455 5400 eða á netfanginu adalsteinn@byggdastofnun.is

Árshlutareikningur janúar - júní 2020