Fréttir

Ársfundur Byggðastofnunar var haldinn að Bifröst þann 10. júní sl. Fundurinn hófst kl. 10 með því að Páll Brynjarsson bæjarstjóri í Borgarbyggð setti fund, en hann var fundarstjóri. Þá flutti Valgerður Sverrisdóttir, iðnaðar- og viðskiptaráðherra, ávarp þar sem hún gerði m.a. grein fyrir breyttri stöðu stofnunarinnar og úttekt sem nú er verið að vinna. Einnig kom fram að ráðherra hefði til skoðunar að leggja fram frumvarp til breytinga á lögum um stofnunina á komandi haustþingi. Því næst flutti Herdís Sæmundardóttir, stjórnarformaður, ræðu og Aðalsteinn Þorsteinsson forstjóri flutti skýrslu sína. Í báðum erindum var nokkuð fjallað um stöðu stofnunarinnar í ljósi breyttra aðstæðna á fjármálamarkaði, en jafnframt sagt frá helstu verkefnum sem stofnunin tekur þátt í, bæði innan lands og utan. Að fundi loknum var haldið málþing þar sem fjallað var um menntun og menningu sem byggðamál, en um þau málefni fjölluðu þau Runólfur Ágústsson, rektor Viðskiptaháskólans á Bifröst og Þórunn Sigurðardóttir, listrænn stjórnandi Listahátíðar í Reykjavík. Þriðja erindið flutti Gísli Gíslason, bæjarstjóri á Akranesi, en hann fjallaði um byggðaþróun á Vesturlandi og loks flutti erindi Snorri Björn Sigurðsson, forstöðumaður þróunarsviðs Byggðastofnunar, sem m.a. gerði alþjóðlegt samstarf á sviði byggðamála að umtalsefni.