Fréttir

Árleg ráðstefna Norðurslóðaáætlunarinnar (NPA) var haldin 21. september síðastliðinn í Galway á Írlandi. Yfirskrif ráðstefnunnar í Galway var Blue Opportunities: The Marine Economy in the NPA. Um 130 þátttakendur frá 12 löndum voru samankomnir til að fjalla um tækifæri og vaxtamöguleika sem til staðar eru í sjávarlífhagkerfinu sem er mikilvægt fyrir NPA-löndin sem deila auðlindum Atlantshafsins.

Á ráðstefnunni var m.a. fjallað um margvíslega nýtingamöguleika hafsins, yfirfærslu þekkingar og upplýsingamiðlun þvert á áætlanir og rannsóknarsvið til að efla vöxt samfélaga sem byggja afkomu sína á sjávartengdum atvinnugreinum.

Í forgangi hjá NPA er að styrkja samstarfsverkefni sem stuðla að nýsköpun og frumkvöðlastarfsemi sem hafa að leiðarljósi sjálfbæra nýtingu auðlinda, samhliða umhverfisvernd og aðlögun að loftslagsbreytingum.    

Á ráðstefnunni voru þrjú erindi undir yfirskriftinni: Sjávartengd frumkvöðlastarfsemi m.a. var kynning á NPA verkefnunum Smart Fish og Urchin. Háskóli Íslands leiðir Smart Fish í verkefninu er unnið að þróun og hönnun snjallstrikamerkja og örgjafa sem tryggja rekjanleika matvæla, frá framleiðanda til neytanda. Hafrannsóknarstofnun Íslands, Þórishólmi og Matís taka þátt í Urchin sem felst m.a. í að kortleggja ígulkerastofninn, þróun nýtingamöguleika og þróun nýrra aðferða við veiðar. Flutt voru þrjú erindi undir yfirskriftinni: Hafið, ströndin og umhverfið, m.a. var kynning á NPA verkefninu APP4SEA sem Háskóli Íslands tekur þátt í samstarfi við Landhelgisgæsluna. Unnið er að þróun hugbúnaður sem sameinar í rauntíma skipaferðir, veðurfar og hafstrauma. 

Hugbúnaðurinn nýttist m.a. til að samhæfa viðbragðsáætlanir á Norðurslóðum ef slys og/eða mengunaróhöpp verða. Að lokum voru þrjú erindi undir yfirskriftinni: Þátttaka allra, sjálfbær vöxtur og ferðaþjónusta. Ráðstefnugestir fengu m.a. að kynnast færeyskri gestrisni (heimablídni). Víða í Færeyjum er skortur á þjónustu við ferðamenn og á nyrstu eyjunum eru fá eða engin veitingahús.. Heimamenn hafa svarað aukinni eftirspurn eftir þjónustu m.a. með því að bjóða gestum heim til sín. Á meðan erindinu stóð barst ilmur af nýbökuðum vöfflum um salinn og nutu ráðstefnugestir góðs af færeyskri gestrisni.   

Öll erindin eru aðgengileg hér. http://www.interreg-npa.eu/events/npa-annual-event-2017-blue-opportunities-the-marine-economy-in-the-npa/