Fréttir

Dagana 18.-19. maí sl. var haldin í Reykjavík ráðstefna á vegum NORA undir yfirskriftinni North Altantic Opportunities. Katrín Júlíusdóttir iðnaðarráðherra setti ráðstefnuna, en Birna Lárusdóttir, forseti bæjarstjórnar Ísafjarðarbæjar var ráðstefnustjóri.

Skýrsla um Hagvöxt landshluta birtist nú fjórða sinn og að þessu sinni er fjallað um árin 2003-2008. Skýrslan er unnin af Dr. Sigurði Jóhannessyni hjá Hagfræðistofnun Háskóla Íslands fyrir Byggðastofnun og í samvinnu við starfsmenn stofnunarinnar. Í skýrslunni eru tölur fyrir árið 2007 reiknaðar eins og áður en tölur fyrir árið 2008 áætlaðar.

Byggðastofnun hefur fengið Fasteignskrá Íslands til að reikna út fasteignamat og fasteignagjöld á sömu fasteigninni vítt um landið. Viðmiðunareignin er einbýlishús sem er 161,1 m2 að grunnfleti og 351m3. Stærð lóðar er 808m2. Gjöldin eru reiknuð út samkvæmt núgildandi fasteignamati sem gildir frá 31. desember 2009.

Dagana 18.-19. maí nk. stendur NORA fyrir ráðstefnu og vinnufundi á Nordica í Reykjavík, undir yfirskriftinni North Atlantic Opportunities. Meginviðfangsefni ráðstefnunnar er fiskeldi og orkumál (endurnýjanlegir orkugjafar).

Skrifstofa ESPON (ESPON CU) í Esch-sur-Alzette í Lúxemborg auglýsir nú 2 lausar stöður í 5 mánuði í starfsþjálfun fyrir háskólanema á lokastigi náms í svæðaþróun og skipulagi, landfræði, svæðahagfræði, Evrópufræðum, stjórnmálafræði eða öðrum greinum sem tengjast byggða- og svæðaþróun. Eftirsóknarvert er að umsækjendur geti hafið störf sem fyrst. Nánari upplýsingar er að finna á heimasíðu ESPON eða hér.

Ársreikningur Byggðastofnunar fyrir árið 2009, var staðfestur af stjórn stofnunarinnar 30. apríl 2010. Tap ársins nam 3.015 mkr. Samkvæmt ársreikningnum er eigið fé stofnunarinnar 1.130 mkr.

Tillag til þingsályktunar um stefnumótandi byggðaáætlun fyrir árin 2010-2013 liggur nú fyrir Alþingi. Í athugasemdum við þingsályktunartillöguna segir svo: „Haustið 2008 fól iðnaðarráðherra Byggðastofnun að vinna frumdrög að nýrri byggðaáætlun sem skyldi byggja á grunni gildandi áætlunar fyrir árin 2006-2009. Árið 2009 var ákveðið að móta byggðaáætlunina þannig að hún yrði fyrst og fremst innlegg í Sóknaráætlun 2020 sem nú er unnið að.“

Til undirbúnings fyrir gerð tillagna að umsóknarverkefnum sem auglýst verður eftir frá 3. maí nk. gengst ESPON fyrir upplýsingadegi og samstarfsfundi (Info Day on New Calls and Partner Café) í Brussel 18. maí nk. eins og lesa má nánar um á þessari slóð. Þessi vettvangur er kjörinn til þess að fræðast um áherslur og umsóknarskilyrði, til þess að fræðast um samstarfsnet og finna samstarfsaðila.

Iðnaðarráðherra, Katrín Júlíusdóttir, heimsótti Byggðastofnun á Sauðárkróki þriðjudaginn 6. apríl. Aðalsteinn Þorsteinsson forstjóri Byggðastofnunar kynnti ráðherra fyrir starfsmönnum stofnunarinnar og helstu verkefnum þeirra.  Að lokum fundaði ráðherra með forstjóra og forstöðumönnum sviða sem kynntu ráðherra helstu viðfangsefni stofnunarinnar nú um stundir og hvað er fram undan í starfseminni.

Styrkir til atvinnureksturs kvenna til markaðssetningar erlendis á handverki og hönnun voru afhentir við formlega athöfn í Mýrinni í Kringlunni fimmtudaginn 18. mars sl. kl 14:00. Jafnframt var opnuð sýning í Mýrinni á þeim verkefnum sem hlutu styrk. Sýningin er liður í HönnunarMars sem stendur til sunnudagsins 21. mars.