Fréttir

Eyrarrósina 2008 hreppti tónlistarhátíðin Aldrei fór ég suður og var hún afhent við hátíðlega athöfn á Bessastöðum 10. janúar.

Síðastliðin fjögur ár hefur Aldrei fór ég suður verið haldin á Ísafirði en hátíðin er skipulögð af heimamönnum og áhugafólki um tónlist. Í umsögn dómnefndar um Aldrei fór ég suður segir: Óvenjuleg og spennandi tónlistarhátíð, þar sem ungt fólk er í fararbroddi. Merk tónlistarhefð svæðisins samtvinnuð því nýjasta sem er að gerast í tónlistarlífi landsins. Verkefnið hefur á undanförum árum vaxið og eflst og vakið mikla athygli langt út fyrir landsteinana og skipar þannig alveg sérstakan sess í öflugu tónlistarlífi landsins. Hefur dregið athygli að landshlutanum með einstöku framlagi eins fremsta tónlistarmanns landsins, Mugison. Mikilvægur stuðningur kraftmikilla einstaklinga og bæjarfélagsins  hafa tryggt hátíðina í sessi sem eina öflugustu menningarhátíð landsins.

Þeir sem hafa borið hitann og þungann af tónlistarhátíðinni á Ísafirði eru Guðmundur M. Kristjánsson, sonur hans; tónlistarmaðurinn Örn Elías (a.k.a. Mugison), Smári Karlsson, Hálfdán Bjarki Hálfdánarson, Greipur Gíslason, Jón Þór Þorleifsson og Rúnar Óli Karlsson. Aldrei fór ég suður 2008 verður haldin á Ísafirði 21.- 23. mars nk. Sjá nánari upplýsingar á http://www.aldrei.is/