Fréttir

Senn líður að lokum starfstíma Kristjáns Þ. Halldórssonar, sérstaks verkefnisstjóra Byggðastofnunar á Raufarhöfn, en ráðningartímabilið er til 30. júní nk.  

Frá því að umræða um þróunarverkefni Byggðastofnunar, Norðurþings, Atvinnuþróunarfélags Þingeyinga, Háskólans á Akureyri og íbúa Raufarhafnar hófst, á vormánuðum 2012, hefur ýmislegt verið til umfjöllunar og árangur náðst í nokkrum málum en minni í öðrum.  Dæmi um árangur eru aukin umsvif í veiðum og vinnslu, stofnun Rannsóknastöðvarinnar Rifs, sem er ætlað að hvetja erlenda og innlenda vísindamenn til að rannsaka náttúru Melrakkasléttu, áfangi í uppbyggingu Heimskautsgerðis, vinna við mótun Raufarhafnar sem áfangastaðar ferðamanna og sérstakt átak í orkusparandi aðgerðum.  Frumkvæði íbúa í félagsstarfi hefur blómstrað og ber sérstaklega að nefna öflugt starf eldri borgara í nýju Félagi eldriborgara Raufarhöfn (FER) og Íbúasamtök Raufarhafnar.  Enn fremur gott starf sjálfboðaliða við uppsetningu og rekstur heimasíðu Raufarhafnar á vegum íbúasamtakanna, með stuðningi Norðurþings.  Ofangreint, ásamt t.d. góðri samstöðu um að fegra umhverfi við sparkvöll og fl.  er  stór þáttur í að efla og styrkja sjálfsmynd og ímynd samfélagsins á Raufarhöfn og það er afar mikilvægur liður í að snúa vörn í sókn.

Einn helsti lærdómurinn af verkefninu er þó sá að það er er ekki að vænta viðsnúnings í möguleikum byggðarlags til að blómstra á einum degi eða einu til tveimur árum.  Því er það ásetningur þeirra sem að verkefninu standa að móta framhald þess á næstu mánuðum og er það jafnframt hluti af yfirstandandi vinnu Byggðastofnunar við að móta verklag er getur gagnast byggðarlögum sem þurfa og vilja snúa vörn í sókn.  Verklagið hefur fram að þessu í daglegu tali verið kallað „Brothættar byggðir“.

Kristján mun starfa áfram á Þróunarsviði Byggðastofnunar og verður starfsstöð hans á Kópaskeri.