Fréttir

Árið 2019 samþykkti Byggðarannsóknasjóður að styrkja rannsóknarverkefnið „Betri búskapur – bættur þjóðarhagur“ sem unnin var af sérfræðingum Landbúnaðarháskólans og nokkrum samstarfsaðilum. Nú er þessu verkefni lokið og lokaskýrsla komin út.

Verkefnið snerist um að greina þróun landbúnaðar á Íslandi á undanförnum áratugum og meta framtíðarhorfur og tækifæri með áherslu á jarðrækt, ylrækt, sauðfjárrækt og nautgriparækt. Þá var horft til þess hvernig LbhÍ geti byggt upp aðstöðu á Hvanneyri og á Hesti til rannsókna, nýsköpunar og kennslu.

Í lokaorðum skýrslunnar segir m.a. að með bættri aðstöðu, auknum rannsóknum og nýsköpunarverkefnum verði „lagður grunnur að framtíðaruppbyggingu og stefnumótun í landbúnaði með áherslu á heilnæmi, sjálfbærni og öryggi matvæla ... Uppbygging og viðhald á góðri aðstöðu er forsenda þess að vel takist til því það er ljóst að betri búskapur skilar bættum þjóðarhag.“

Lokaskýrsla rannsóknarinnar er í ritstjórn Daða Más Kristóferssonar, Ragnheiðar Ingu Þórarinsdóttur og Þórodds Sveinssonar.

Skýrsluna má nálgast hér.