Fréttir

Halldóra K. Hauksdóttir

Halldóra K. Hauksdóttir, fráfarandi formaður stjórnar Byggðastofnunar, lagði á það áherslu í erindi sínu á ársfundi stofnunarinnar sem nú stendur yfir í Bolungarvík, að virk byggðastefna sé í þágu allra landsmanna, ekki eingöngu einstakra byggða. „Miklu skiptir að halda byggð í öllu landinu því þannig getum við best nýtt alla þá landkosti og auðlindir sem á landinu finnast. Í ljósi síðustu atburða þar sem jörð skelfur, jarðeldar loga og spár eru um að nú sé gengið í garð nýtt eldgosatímabil, er þá ekki ástæða til að stjórnvöld og allur almenningur fari að ígrunda hvort ekki sé rétt að grípa til einhverra þeirra ráðstafana sem gera búsetu utan þessa eldvirka svæðis að eftirsóknarverðum búsetukosti?”.

Þá sagði Halldóra að byggðamál hafi verið skilgreind á þann veg að þau séu öll þau viðfangsefni sem hafi áhrif á lífsgæði og samkeppni landshluta, s.s. búsetu, atvinnu og nýsköpun. Þau snúa að eflingu samfélaga, félagsauðs, atvinnulífs, menntunar, menningar, velferðarmála, samgangna og fjarskipta og hafa að markmiði blómlega byggð um land allt.