Fréttir

Mánudaginn 12. mars sl. gekkst Byggðastofnun fyrir ráðstefnu í Háskólanum í Reykjavík um þátttöku Íslands í evrópsku samstarfi um rannsóknir og stefnumótun í byggðaþróun undir yfirskriftinni ESPON og Ísland. Aðalsteinn Þorsteinsson forstjóri Byggðastofnunar setti ráðstefnuna og henni stjórnaði Sveinn Þorgrímsson skrifstofustjóri byggðamála í iðnaðarráðuneytinu. Dagskrá ráðstefnunnar má sjá hér

Í ESPON starfa saman lönd Evrópusambandsins og Noregur, Sviss, Liechtenstein og Ísland að mótun áherslusviða fyrir rannsóknir á sviði byggðaþróunar, að styrkveitingum til rannsókna í samræmi við þessar áherslur á samkeppnisgrundvelli og að landfræðilegu upplýsingasafni um byggðaþróun í Evrópu.

Aðalerindið á ráðstefnunni flutti Peter Mehlbye, forstöðumaður ESPON, sem svaraði líka fyrirspurnum annarra þátttakenda í ráðstefnunni. Hann fór breitt yfir starfsemi ESPON, starfshætti, skipulag, áherslur, rannsóknir og útgáfur og gerði grein fyrir stöðu ESPON og framtíðarhorfum á næsta starfstímabili, 2014-2020. Þá sýndi hann kynningarmyndband fyrir ESPON þar sem íslensku umhverfi bregður fyrir á meðan fólk úr stjórnmálum, háskólum og stjórnsýslu tjáir sig um mikilvægi ESPON. Myndbandið má sjá hér .  Erindi Peters var í þremur köflum og glærurnar, tölusettar á sama hátt, má sjá hér. Aðrir sem erindi fluttu á ráðstefnunni töluðu um ýmsar hliðar fjölþjóðlegs samstarf um byggðarannsóknir og tengingu við stefnumótun á Íslandi og um sóknaráætlanir landshluta. Glærur þeirra má sjá hér .

Einn tilgangur Byggðastofnunar með ráðstefnunni var að afla efnis og viðhorfa í umræðu um þátttöku Íslands í ESPON á næsta starfstímabili. Á ráðstefnunni kom fram stuðningur við áframhald, bæði frá stjórnsýslu- og rannsóknastofnunum. Sú umræða mun halda áfram samhliða undirbúningi ESPON fyrir næsta starfstímabil eins og kom fram í máli Sveins ráðstefnustjóra og Aðalsteins forstjóra í lok ráðstefnunnar og Stefaníu Traustadóttur í innanríkisráðuneytinu sem að endingu tók saman meginatriði ráðstefnunnar.

Aðalsteinn minnti í lokaorðum á opið málþing ESPON í Álaborg 13. og 14. júní nk. þar sem gefst færi á fræðslu um ESPON og rannsóknarverkefnin, til tengslamyndana og til þess að taka þátt í umræðum um framtíðarstarf og áherslur ESPON.

Hægt er að fylgjast með gangi mála á heimasíðu ESPON .