Fréttir

Þann 5. júní sl. var úthlutunarathöfn á Kópaskeri þar sem styrkjum var úthlutað úr verkefninu Öxarfjörður í sókn vegna ársins 2020. Alls hlutu 12 verkefni styrki. Verkefnin eru fjölbreytt en eiga það flest sameiginlega að stuðla að atvinnuuppbyggingu á svæðinu.

Alls bárust 23 umsóknir og heildarkostnaður verkefna er rúmlega 125 m.kr. en sótt var um tæpar 52 m.kr. Alls voru 13,5 m.kr. til úthlutunar. Eru það meiri fjármunir en hefur verið til úthlutunar í verkefninu Brothættar byggðir og skýrist það af átaksverkefni sem Alþingi samþykkti vegna veirufaraldurs. Hluti af aðgerðum átaksverkefnisins var að veita aukalega 100 m.kr. til Brothættra byggða á árinu 2020 m.a. til að hægt væri að styðja við stærri frumkvæðisverkefni íbúa sem skapa atvinnu í byggðarlögunum.

Heildarlisti yfir styrkþega vegna styrkja fyrir árið 2020:

Þessi fjölbreyttu verkefni miða að atvinnuuppbyggingu, ferðaþjónustu, fullvinnslu matvæla og samfélagsuppbyggingu í Öxarfjarðarhéraði.

Styrkþegum var boðið til formlegrar úthlutunarathafnar og veitinga í Öxi á Kópaskeri en úthlutun ársins 2020 er jafnframt seinasta úthlutunin í verkefninu Öxarfjörður í sókn þar sem Byggðastofnun mun draga sig í hlé úr verkefninu um næstu áramót. Kristján Þór Magnússon, sveitarstjóri Norðurþings stýrði athöfninni en í erindi hans kom fram að verkefnið Brothættar byggðir hefur skipt byggðarlagið miklu máli og sagði hann frá því að sveitarfélagið horfir til þess að halda áfram á þessari braut eftir að Byggðastofnun hefur dregið sig í hlé.