Fréttir

Stjórn Byggðastofnunar ákvað á fundi sínum þann 17. desember sl. að styrkja þrjá meistaranema sem vinna að lokaverkefnum á sviði byggðamála. Heildarupphæð styrkjanna er ein milljón króna. Veittur er einn styrkur að upphæð 400.000 krónur, en tvö verkefni hljóta styrk að fjárhæð 300.000 krónur. Viðfangsefnin snúast um hvernig byggja megi upp miðbæjarkjarna í þéttbýli, stöðu þorpa gagnvart stærri byggðakjörnum innan sama sveitarfélags og það verkefni sem hæstan styrk hlýtur snýst um að kanna hvernig byggingar sem hýst hafa atvinnustarfsemi en gera ekki lengur geta nýst og eru nýttar í dag.

Auglýsing um styrkina birtist í lok september og umsóknarfrestur rann út á miðnætti 5. nóvember. Alls bárust sjö umsóknir.  Styrkirnir eru fjármagnaðir af byggðaáætlun og skulu verkefnin sem sótt er um styrk til hafa skírskotun til markmiða eða aðgerða byggðaáætlunar.

Verkefnin sem styrk hljóta eru:

Finding the Phoenix Factor. Upphæð kr. 400.000,-

Styrkþegi er David Andrew Kampfner, meistaranemi á sviði strandsvæða og byggðaþróunar við Háskólasetur Vestfjarða.

Skoða á byggingar þar sem áður var atvinnustarfsemi (iðnaðarminjar) og hvernig þær byggingar eru endurnýttar í dag í þágu annarrar starfsemi, s.s. síldarverksmiðjuna á Djúpuvík á Ströndum, Nes-listamiðstöð á Skagaströnd og Síldarminjasafnið á Siglufirði.

Greining á möguleikum í miðbæjaruppbyggingu á Húsavík og samanburður við byggðakjarna af svipaðri stærð. Upphæð kr. 300.000,-

Styrkþegi er Atli Steinn Sveinbjörnsson, á sviði skipulagsfræði við Landbúnaðarháskóla Íslands.

Skoða á þætti í smærri byggðarkjörnum sem nota má við uppbyggingu miðbæjarkjarna byggðarkjarna sem telja 1000-3000 manns. Gerð verður tillaga að uppbyggingu miðbæjarkjarna á Húsavík.

Þriðja þéttbýlið – sérstaða Stokkseyrar innan sveitarfélagsins Árborgar. Upphæð kr. 300.000,-

Styrkþegi er Vigfús Þór Hróbjartsson, á sviði skipulagsfræði við Landbúnaðarháskóla Íslands.

Skoða á möguleika smárra þorpa gagnvart öflugri þéttbýliskjörnum innan sama sveitarfélags. Aðferð rannsóknarinnar og niðurstöður má síðan heimfæra að hluta eða að öllu leyti á sambærilega þéttbýlisstaði. Skoða á styrkleika Stokkseyrar umfram hina tvo þéttbýlisstaðina í Árborg, Selfoss og Eyrarbakka.

Byggðastofnun óskar styrkþegum til hamingju!