Fréttir

frá undirritun samkomulagsins

Föstudaginn 20. október var skrifað undir samkomulag um samstarf milli Byggðastofnunar og Háskólans á Bifröst. Arnar Már Elíasson forstjóri og Sigríður Elín Þórðardóttir forstöðumaður þróunarsviðs skrifuðu undir fyrir hönd Byggðastofnunar og Margrét Jónsdóttir Njarðvík rektor og Stefan Wendt staðgengill rektors fyrir hönd Háskólans á Bifröst.

Markmið samkomulags er að efla samstarf í þágu rannsókna og þekkingar á byggða- og sveitarstjórnarmálum og á vægi menningar og skapandi greina í landsbyggðunum. Að efla vitund og kynningu á niðurstöðum rannsókna svo ávinningur og notagildi gagnist sem best við stefnumótun og ákvarðanatöku. Auk þess að stuðla að jákvæðri byggðaþróun sem og sjálfbærni byggða og sveitarfélaga með því að efla faglega umræðu sem byggir á gögnum og þekkingu.

Samstarf hingað til hefur verið farsælt en með því að setja um það umgjörð standa vonir til að stuðlað verði að auknum ávinningi og áframhaldandi byggðaþróun landsbyggðanna. Tengiliðir samstarfs eru Hanna Dóra Björnsdóttir sérfræðingur á þróunarsviði  Byggðastofnunar og Vífill Karlsson prófessor við Háskólann á Bifröst.