Fréttir

Byggðastofnun hefur nú í ár líkt og undanfarin ár, fengið Þjóðskrá Íslands til að reikna út fasteignamat á sömu viðmiðunarfasteigninni á 26 þéttbýlisstöðum á landinu. Eru nú til árleg og sambærileg gögn frá árinu 2010 til ársins 2020.

Viðmiðunareignin er einbýlishús sem er 161,1 m² að grunnfleti. Stærð lóðar er 808 m² og rúmmál eignar er 476 m³. Fasteignagjöld eru reiknuð út af Byggðastofnun samkvæmt álagningarreglum ársins 2020 eins og þær eru í hverju sveitarfélagi, út frá því fasteignamati sem Þjóðskrá reiknar og gildir frá 31. desember 2019.

Fasteignamat
Heildarmat, sem er samanlagt verðmat fasteignar og lóðar, er mjög mismunandi eftir því hvar á landinu fasteignin er. Fjórða árið í röð er Bolungarvík með lægsta heildarmatið, var 16,1 m.kr. í lok árs 2018 en er 16,6 m.kr. í lok árs 2019. Öll árin hefur matið verið hæst á höfuðborgarsvæðinu en er áberandi hæst í Suður-Þingholtunum, er nú rúmar 103 m.kr.
Af þeim þéttbýlisstöðum sem skoðaðir voru utan höfuðborgarsvæðisins, hefur matið verið hæst á Akureyri undanfarin ár en nú er Akranes með hærra mat eða 55,7 m.kr. miðað við 54,4 m.kr. á Akureyri.

Heildarmat hefur hækkað hlutfallslega mest á Ísafirði á milli ára, eða um 23,17% og næst mest á Akranesi um 23,15%.  Lægsta heildarmatið er í Bolungarvík 16,6 m.kr. sem er 2,4 m.kr. lægra en á Seyðisfirði og 3,0 m.kr. lægra en á Patreksfirði.

Fasteignagjöld
Þegar horft er á fasteignagjöldin breytist myndin töluvert, en til fasteignagjalda teljast fasteignaskattur, lóðarleiga, fráveitugjald, vatnsgjald og sorpgjald. Vegna mismunandi álagningarregla sveitarfélaga er ekki tengsl á milli heildarmats og heildargjalda á landinu en til dæmis er langhæsta matið í Suður-Þingholtunum en fjórðu hæstu gjöldin.

Heildargjöld höfðu verið hæst í Keflavík í Reykjanesbæ þrjú ár í röð, en eru nú þriðju hæst. Þau voru fyrir ári síðan 453 þ.kr. en eru nú 430 þ.kr. Nú eru þau hæst á Selfossi 441 þ.kr. og næst hæst í Borgarnesi 431 þ.kr. Í ár eru gjöldin lægst á Hólmavík 270 þ.kr. sem er 61% af hæstu gjöldum, á Selfossi. Mesta krónutöluhækkun á milli ára er í Dalvík upp á 49 þ.kr. Meðaltalsgjöld eru tæp 357 þ.kr.

Sjá má frekari upplýsingar í meðfylgjandi skýrslu.