Fréttir

Opnað hefur verið fyrir umsóknir um undirbúningsverkefni í Norðurslóðaáætluninni (NPA) og er umsóknarfrestur til kl. 10:00 þann 22. september (hádegi skv. mið-evrópskum tíma). Gert er ráð fyrir að umsóknir verði afgreiddar seinni hluta nóvember.

Undirbúningsverkefni eru góður vettvangur til að þróa öflug verkefni og umsóknir um aðalverkefni. Tilgangurinn er að þróa verkefnahugmyndir, gera þarfagreiningar og byggja upp teymi samstarfaðila til að keyra viðkomandi aðalverkefni.

Frekari upplýsingar um kallið og þá skilmála sem gilda er að finna á heimasíðu áætlunarinnar og einnig má hafa samband við landstengilið áætlunarinnar, Reinhard Reynisson á netfanginu reinhard@byggdastofnun.is. 

Norðurslóðaáætlunin (Northern Periphery and Arctic Programme) er samstarfsvettvangur Evrópusambandsríkjanna Írlands,  Svíþjóðar og Finnlands og svo Noregs, Íslands, Grænlands og Færeyja. Markmið áætlunarinnar er að stuðla að samstarfsverkefnum milli landanna sem miða að því að finna lausnir á sameiginlegum áskorunum á sviði atvinnu- og byggðaþróunar og er núgildandi áætlunartímabil 2021-2027.