Fréttir

Á ársfundi sínum sem haldinn var á Flúðum þann 6. júní s.l. samþykkti Norræna Atlantssamstarfið, NORA, að styrkja tíu verkefni. Íslendingar taka þátt í sjö þeirra. Alls er varið 2,3 milljónum danskra króna í þessa styrki.

Verkefnin sem hlutu styrk eru eftirfarandi:

 Flekksteinbit. Denvo Wolffish Iceland ehf. leiðir þetta verkefni. Verkefnið fjallar um veiðar á hlýra með eldi í huga.  Löng hefð er fyrir veiðum á hlýra í Noregi og hefur líka lengi verið reynt að ala hann.

 Taste of the Nordic Showcase. ArktiskMat tengist árlegum viðburði, sem rekja má til ársins 2012. Halda á ráðstefnu þar sem matreiðslunemar af öllu svæðinu vinna saman og deila þekkingu, elda mat úr staðbundnu hráefni og bjóða gestum og gangandi að smakka. Íslenskur þátttakandi: Matreiðsluskólinn í Kópavogi (MK).

 ICE Atlantic Youth Community. Verkefnið snýst um að miðla frumkvöðlahugsun til ungs fólks, deila hugmyndum, þekkingu bæði gegnum netið og með því að hittast. Með því á að skapa vettvang fyrir frumkvöðlastarfsemi ungs fólks. Íslenskur þátttakandi: Ungmennafélag Íslands.

 Sustainable Packaging Solution. Innleiða á umhverfisvænni umbúðir og minnka þannig sorp. Gefin verður út skýrsla til leiðbeiningar fyrir fyrirtæki. Ísland er ekki með í þessu verkefni.

 Sustainable Business Accelerator. Gera á kennsluefni í sjálfbærni milli þátttökulandanna. Auka á hæfni atvinnulífs og jákvætt framlag í minnkun kolefnisútblásturs. Ísland er ekki enn þátttakandi í verkefninu en stefnt er að íslenskri þátttöku.

 SEAMASK III, framhaldsverkefni. Vinna skal með niðurstöður úr fyrra verkefni sem m.a. snerist um að hanna andlitsgrímur úr fiskroði, lambskinni og selskinni. Í þessu verkefni á að markaðssetja grímurnar. Íslenskir þátttakendur: Madara Sudare, Mindaugas Andrijauskas og Hjörleifur Sveinbjörnsson.

 Trendy Cod, framhaldsverkefni. Snýst um framleiðslu tilbúinna matvæla úr hefðbundnum saltfiski og þurrkuðum fiski. Íslenskir þátttakendur: Matís, Samtök fyrirtækja í sjávarútvegi, Klúbbur matreiðslumeistara/Keilir og MK og Grímur kokkur.

 Arktisk natur og ungdom, framhaldsverkefni. Háskólinn á Hólum leiðir verkefnið. Koma skal á fót umhverfisverkefnum sem ungt fólk leiðir. Áhersla er lögð á loftslagsbreytingar og áhrif þeirra á líf á heimskautasvæðinu. Safna á heimildum eða gögnum fyrir rannsókn á þessu efni og einnig hugsað til kennslu um viðfangsefnið. Aðrir íslenskir þátttakendur: Selasetrið og Náttúruminjasafn Íslands.

 Destilleriturisme, forverkefni. Snýst um framleiðslu á brenndum vínum og hvernig megi tengja við ferðaþjónustu. Ísland er ekki með í þessu verkefni.

 North Atlantic Future with Marine Mammals, forverkefni á vegum Nammco. Markmiðið er að upplýsa ungt fólk um mikilvægi sel- og hvalveiða fyrir samfélög á norðurslóðum, með gerð fræðsluefnis.

Næsti umsóknarfrestur er mánudagurinn 1. október 2023, til miðnættis. Nánar má kynna sér umsóknarferlið á slóðinni https://nora.fo/guide-til-projektstotte

Opnað verður fyrir umsóknir í lok ágúst. Um svipað leyti verður einnig boðið upp á fræðslu gegnum netið, í svokölluðu webinar.