Fréttir

Skjáskot úr mælaborði

Mælaborð Byggðastofnunar um íbúafjölda sveitarfélaga og byggðakjarna hefur verið uppfært með mannfjöldatölum Hagstofu Íslands fyrir 1. janúar 2023. Í mælaborðinu er kort sem sýnir byggðakjarna og sveitarfélög en upplýsingar um íbúafjölda, kynjaskiptingu og aldursdreifingu eru sýndar í töflum og gröfum. Í flipanum „Töfluyfirlit“ er síðan hægt að sía gögnin eftir helstu breytum og sjá þannig upplýsingar um valinn hóp landsmanna. Hægt er að fara inn á mælaborðið á heimasíðu Byggðastofnunar.

Íbúar á Íslandi eru 387.758 en þar af búa 369.048 (95%) í byggðakjörnum og 18.710 (5%) í dreifbýli. Á höfuðborgarsvæðinu eru 240.882 íbúar (64% landsmanna) en 135.366 (36%) búa utan höfuðborgarsvæðis. Íbúum landsins fjölgaði um 11.510 (3,1%) á árinu 2022 en mest fjölgun varð á Suðurnesjum (6,7%) og á Suðurlandi (4,2%).

Sveitarfélög

Á Höfuðborgarsvæðinu fjölgaði íbúum hlutfallslega mest í Kjósarhreppi (16,8%), Mosfellsbæ (3,1%) og Reykjavíkurborg (3,1%) en á Suðurnesjum varð mest fólksfjölgun í Reykjanesbæ (8,0%) og þar næst í Suðurnesjabæ (4,6%). Á Vesturlandi varð mest fjölgun í Skorradalshreppi (25,0%), Eyja- og Miklaholtshreppi (11,8%) og í Hvalfjarðarsveit (11,4%) en á Vestfjörðum fjölgaði íbúum Árneshrepps um 11,9% og Súðavíkurhrepps um 9,3%. Á Norðurlandi vestra fjölgaði íbúum Húnaþings vestra um 2,6% og á Norðurlandi eystra fjölgaði í Hörgársveit um 10,8% og í Svalbarðsstrandarhreppi um 8,0%. Á Austurlandi fjölgaði íbúum hlutfallslega mest í Múlaþingi (3,0%) og á Suðurlandi varð mest hlutfallsleg fjölgun í Ásahreppi 13,0% og þar næst í Bláskógabyggð 10,0%.

Byggðakjarnar

Byggðakjarni er, samkvæmt skilgreiningu Hagstofunnar, þéttbýli innan eins sveitarfélags með 50 eða fleiri íbúa og minna en 200 metra á milli húsa. Í gögnum Hagstofunar fyrir 1. janúar 2023 eru upplýsingar um íbúafjölda í 106 byggðakjörnum eftir aldri og kyni.

Fjölmennustu byggðakjarnar landsins eru Reykjavík (138.693 íbúar), Kópavogur (39.733), Hafnarfjörður (30.568), Reykjanesbær (21.950) og Akureyri (19.623) en á öllu landinu eru 32 byggðakjarnar með fleiri en 1.000 íbúa. Tólf byggðakjarnar eru með 50-100 íbúa og þeirra fámennastir eru Grímsey (55 íbúar), Árbæjarhverfi í Ölfusi (59), Bakkafjörður (59), Brautarholt á Skeiðum (65), Brúnahlíð í Eyjafirði (69) og Drangsnes (71).

Þó eitt ár sé stuttur tími eru nokkrir byggðakjarnar á landinu þar sem íbúum fjölgaði um meira en 10% milli ára. Það eru Bifröst (128,3%), Melahverfi í Hvalfjarðarsveit (33,1%), Lónsbakki í Hörgársveit (28,8%), Reykholt í Borgarfirði (25,3%), Laugarvatn (16,0%), Nesjahverfi í Hornafirði (14,3%), Innnes í Hvalfjarðarsveit (12,6%), Reykholt í Biskupstungum (12,5%), Tjarnarbyggð í Árborg (12,1%), Breiðdalsvík (10,7%) og Hrafnagil (10,2%).