Fréttir

Ferðafólk á Ísafirði að sumarlagi

Skýrsla um Hagvöxt landshluta er nú gefin út í sjötta sinn og að þessu sinni er fjallað um árin 2007-2011. Skýrslan er unnin af Dr. Sigurði Jóhannessyni hjá Hagfræðistofnun Háskóla Íslands og Sigurði Árnasyni og Snorra Birni Sigurðssyni á Þróunarsviði Byggðastofnunar.

Á árunum  2007 til 2011 varð samdráttur í framleiðsla á þrem svæðum á Íslandi. Þ.e. á  Austurlandi, Suðurnesjum og á höfuðborgarsvæðinu. Þar kallast á við það að á þessum svæðum var hagvöxtur mestur á þensluárunum fram til 2007. Kárahnjúkavirkjun og smíði álvers í Reyðarfirði eru meginástæða vaxtar og samdráttar á Austurlandi, vöxtur og fall bankanna er helsta skýring á breytingu á framleiðslu á höfuðborgarsvæðinu, en hin mikla sveifla sem orðið hefur í efnahagsumsvifum á Suðurnesjum er meira rannsóknarefni. Í öðrum landshlutum breyttist framleiðsla lítið á tímabilinu.

Mest hjaðnaði framleiðsla á Austurlandi frá 2007 til 2011, eða um rúman fimmtung (sjá mynd 1). Það er afleiðing verkloka við Kárahnjúka og við byggingu álvers á Reyðafirði. Næst mest minnkaði framleiðsla á Suðurnesjum á þessum árum, eða um 13%. Það skýrist að stórum hluta af samdrætti í byggingarstarfsemi. Þriðji mesti samdrátturinn varð í höfuðborginni og næsta nágrenni hennar. Þar skrapp framleiðsla saman um 8% frá 2007 til 2011. Samdrátt á höfuðborgarsvæðinu má skýra að hálfu leyti með falli bankanna en einnig með miklum samdrætti í byggingaframkvæmdum.

Nanari upplýsingar gefa Sigurður Árnason og Snorri Björn Sigurðsson í síma 455 5400

Skýrslan Hagvöxtur landshluta 2007-2011