Fréttir

Á dögunum flutti fréttastofa Stöðvar 2 fréttir af atvinnuuppbyggingu á Flateyri. Eldi og vinnsla regnbogasilungs á vegum fyrirtækisins Arctic Odda og Dýrfisks hefur hleypt miklu lífi í atvinnulíf á Flateyri. Dýrfiskur ehf., er að tífalda eldi regnbogasilungs í Dýrafirði, sem kallar á fleiri störf á Vestfjörðum, mest við fiskvinnslu á Flateyri. Í frétt Stöðvar 2 var sagt frá vinnslu regnbogasilungs á vegum nýs félags, Arctic Odda, sem jafnframt hefur keypt fiskeldisstöðina Dýrfisk á Þingeyri.

Í fréttinni sagði Eiríkur Finnur Greipsson, fjármálastjóri Arctic Odda, að verið sé að byggja upp fiskeldið úr 200 tonna slátrun upp í 2000 tonna slátrun á næstu tveimur árum. „Þannig að ég held að megi segja það að hér sé hafin góð og hægfara uppbygging, vonandi mjög traust.“

Dýrfiskur er með eldiskvíar á Dýrafirði og seiðaeldi á Tálknafirði og hefur félagið nú einnig sótt um að leyfi til að ala regnbogasilung í Önundarfirði og í Ísafjarðardjúpi. Systurfélag Dýrfisks er jafnframt að hasla sér völl í hefðbundnum fiskveiðum og gerir út einn bát og annar er á leiðinni.  Starfsmenn fyrirtækjanna eru nú orðnir yfir 30 og boðar Eiríkur Finnur að þeim muni fjölga ört á næstu mánuðum.

Arctic Oddi keypti á síðast liðnu ári eignir þrotabús Eyrarodda af Byggðastofnun, en mikið var fjallað um það mál á sínum tíma.

Hér má sjá frétt Stöðvar 2.