Fréttir

Stjórn Byggðarannsóknasjóðs hefur ákveðið að styrkja fjögur verkefni á árinu 2020. Verkefnin sem styrk hljóta eru rannsóknir sem lúta að áhrifum fjórðu iðnbyltingarinnar, fasteignamarkaði, kortlagningu örorku og verslun í dreifbýli.

Byggðarannsóknasjóður er fjármagnaður af byggðaáætlun og með framlagi frá Byggðastofnun og  hefur þann tilgang að efla byggðarannsóknir og bæta þannig þekkingargrunn fyrir stefnumótun og aðgerðir í byggðamálum.

Auglýst var eftir umsóknum í sjóðinn 8. febrúar og umsóknarfrestur rann út þann 12. mars. Alls bárust 14 umsóknir, samtals að upphæð rúmar 38 m.kr. og heildarkostnaður verkefna er rúmar 58,5 m.kr. Til úthlutunar voru 10 m.kr. Umsóknirnar voru fjölbreyttar og uppfylltu skilyrði sjóðsins.

Verkefnin fjögur sem stjórn Byggðarannsóknasjóðs ákvað að styrkja að þessu sinni eru:

Stutt lýsing á hverju verkefni:

Byltingar og byggðaþróun: hlutverk þekkingarsetra í byggðaþróun fjórðu iðnbyltingarinnar, Þekkingarnet Þingeyinga.

Markmið rannsóknarinnar er að greina áhrif fjórðu iðnbyltingarinnar í byggðum landsins og mögulegar leiðir til að nýta innviði þekkingarsetra til að mæta áskorunum og tækifærum byltingarinnar.

Fasteignamarkaður og foreldrar um land allt: Getur hátt fasteignaverð fælt barnafjölskyldur af landsbyggðinni eða haldið þeim frá? Samtök sveitarfélaga á Vesturlandi.

Tilgangur rannsóknarinnar er að skoða hvað hefur áhrif á búferlaflutninga fólks á barneignaraldri og að styrkja fyrri greiningu á þessum þáttum svo auðveldara sé að hanna íbúaþróunarlíkön fyrir sveitarfélög. Í þriðja lagi að auka skilning á þeim áhrifum sem mikil sókn utanbæjarmanna í íbúðir fjarri heimahögum þeirra kunna að hafa.

Örorka á Norðurlandi eystra – kortlagning, Rannsóknamiðstöð Háskólans á Akureyri (RHA).

Markmiðið með verkefninu er að kortleggja umfang og þróun örorku á Norðurlandi eystra í samhengi við þróun vinnumarkaðar og lýðfræðilegra þátta. Þá er markmið að unnt verði að nýta niðurstöður rannsóknarinnar í þágu þeirra sem vinna að atvinnuþróun, vinnumarkaðsúrræðum, menntamálum endurhæfingu fólks á vinnumarkaði og byggðaþróun og að verkefnið stuðli að aukinni þekkingu á viðfangsefninu á landsvísu.

Verslun í heimabyggð: greining á sóknarfærum dreifbýlisverslana. Umsækjandi Emil B. Karlsson.

Markmið rannsóknarinnar er að leiða í ljós hverjar eru skilvirkustu stuðningsaðgerðir við litlar verslanir í dreifbýli. Niðurstöðum er jafnframt ætlað að sýna hvaða þættir í rekstri dreifbýlisverslana skipta mestu til að lifa af í samkeppni við stærri verslunarkeðjur.

Nánari upplýsingar veitir Sigríður Þorgrímsdóttir sérfræðingur á þróunarsviði Byggðastofnunar  sigga@byggdastofnun.is.