Fréttir

Íslendingar og Norðmenn standa frammi fyrir áþekkum áskorunum varðandi veitingu alþjónustu í póstþjónustu í hinum dreifðu byggðum landanna tveggja. Áskoranir landanna eru t.a.m. hvaða þjónusta skuli falla undir alþjónustu, hversu oft á að dreifa og safna pósti og hvernig tryggja skuli þjónustu í dreifðum byggðum.

Í ljósi þessa hélt Byggðastofnun á dögunum kynningu fyrir nefnd norska Samgönguráðuneytisins sem fjallar um umfang og eðli alþjónustunnar í Noregi til framtíðar. Kynningin fjallaði að mestu um ákvörðun Póst- og fjarskiptastofnunar nr. 13/2020 þar sem Íslandspóstur ohf. var útnefndur alþjónustuveitandi og notkun póstnúmera við afmörkun alþjónustuskyldna og svo ákvörðun Byggðastofnunar nr. Á-14/2023 þar sem virk og óvirk markaðssvæði voru afmörkuð frekar eftir þjónustutegund.

Byggðastofnun fagnar góðu samtali á milli landanna tveggja. Veiting alþjónustu í dreifðari byggðum getur kallað á ýmsar áskoranir og því mikilvægt fyrir báða aðila að geta deilt þekkingu og reynslu.