Fréttir

Forstöðumenn og stjórn Byggðastofnunar nýttu ferðina vestur vegna ársfundar Byggðastofnunar í Bolungarvík til fjölbreyttra heimsókna.  Byrjað var á heimsókn í rækjuvinnsluna Kampa þriðjudaginn 16. apríl en forsvarsmenn fyrirtækisins voru þar með góða kynningu á starfseminni.

Að morgni miðvikudagsins 17. apríl fór hópurinn í heimsókn til Örnu ehf og gekk þar um vinnsluna með forsvarsmönnum félagsins og kynntist starfseminni betur.

Fimmtudaginn 18. apríl heimsóttu Arnar Már forstjóri, Hrund forstöðumaður fyrirtækjasviðs og Sigríður Elín forstöðumaður þróunarsviðs forsvarsmenn Vestfjarðastofu og ræddu ýmis málefni, m.a. svæðiskipulag Vestfjarða, lánveitingar og hlutafé til fyrirtækja á svæðinu, fiskeldi, skipulagsmál og margt fleira auk þess að skoða nýbyggðar stúdentaíbúðir á Ísafirði.  Að því loknu heimsóttu þau bæjarstjóra og hluta sveitarstjórnar Ísafjarðarbæjar hvar fjöldamörg málefni voru til umræðu eins og aflamark Byggðastofnunar, almenningssamgöngur í dreifbýli, lánaflokkar Byggðastofnunar og hlutafjárkaup svo eitthvað sé nefnt.

Sigríður Elín og Arnar Már með Örnu Láru Jónsdóttur, bæjarstjóra á Ísafirði     

Hrund, Sigríður Elín og Arnar Már hér með Peter Weiss og Ester Sturludóttir frá Háskólasetri Vestfjarða ásamt Sigríði Ó. Kristjánsdóttur frá Vestfjarðastofu.

Að kvöldi fimmtudags voru Arnar Már og Sigríður Elín viðstödd úthlutunarhátíð styrkja úr Frumkvæðissjóði Sterkra Stranda sem heyrir undir byggðaþróunarverkefnið Brothættar byggðir þar sem 18 fjölbreyttum verkefnum var úthlutað samtals 23,5 m.kr. til uppbyggingar í Strandabyggð.

Frá afhendingu styrkja úr Frumkvæðissjóði Sterkra Stranda

Kraftur og jákvæðni einkenndi allar þessar heimsóknir og ljóst að Vestfirðir eru í mikilli sókn.