Fréttir

Byggðastofnun mun kynna starfsemi fyrirtækjasviðs stofnunarinnar á Iðnaðarsýningunni sem haldin verður  í Laugardalshöll dagana 30. ágúst – 1. september. Starfsmenn fyrirtækjasviðsins munu kynna lánastarfsemi stofnunarinnar og þá lánaflokka sem í boði eru.

Hrund Pétursdóttir forstöðumaður fyrirtækjasviðs Byggðastofnunar segir mikilvægt að kynna þá möguleika sem fyrirtæki og einstaklingar í rekstri eiga til að fá ráðgjöf, kanna lánamöguleika og þá verkefnafjármögnun sem Byggðastofnun getur komið að. Starfsmenn fyrirtækjasviðs meta síðan lánsbeiðnir sem berast stofnuninni og gera tillögu til lánanefndar og stjórnar í einstökum málum.

Hlutverk Byggðastofnunar er að efla byggð og atvinnulíf með sérstakri áherslu á jöfnun tækifæra allra landsmanna til atvinnu og búsetu. Starfssvæði stofnunarinnar er landið allt utan Höfuðborgarsvæðisins. Þau verkefni sem stofnunin hefur fjármagnað eru fjölbreytt og eru m.a. til landbúnaðar, grænna verkefna, nýsköpunar og fiskvinnslu/útgerða.

Hrund hvetur það  fólk sem tök hefur á, að koma á Iðnaðarsýninguna og taka spjallið við starfsmenn Byggðastofnunar eða hafa samband við starfsmenn fyrirtækjasviðs til að nálgast frekari upplýsingar.