Fréttir

Breiðdalssetur

Uppgjöri verkefnisins Breiðdælingar móta framtíðina er nú lokið. Breiðdalshreppur hóf þátttöku sína í verkefninu Brothættar byggðir árið 2013 og lauk verkefninu formlega í upphafi árs 2019 þegar Byggðastofnun dró sig í hlé.

Á fundi verkefnisstjórnar verkefnisins þann 17. desember 2018 var ákveðið að eftirstöðvar styrkja sem veittir voru árlega á verkefnistímanum skyldu renna til Breiðdalsseturs ses. Nú liggur fyrir heildarupphæð styrksins til Breiðdalsseturs nemur kr. 1.630.000.

Starfsemi Breiðdalsseturs hófst vorið 2011 og allt frá því hefur stjórn setursins og starfsfólk staðið fyrir sýningahaldi yfir sumartímann í Gamla kaupfélaginu á Breiðdalsvík, auk þess að standa fyrir málþingi í sumarlok ár hvert, þar sem þekktir innlendir og erlendir fræðimenn hafa fjallað um þau málefni sem Breiðdalssetur byggir á, en þau eru þrjú:

- Jarðfræði, byggð á verkum breska jarðfræðingsins dr. George P.L. Walker.

- Málvísindum, þar sem horft er til Breiðdælingsins dr. Stefáns Einarssonar.

- Sögu Gamla kaupfélagsins, þorpsins og byggðarlagsins.

Í allmörg ár hefur stjórn Breiðdalsseturs, í samvinnu við Stofnun rannsóknarsetra Háskóla Íslands, unnið að því að stofna Rannsóknasetur HÍ á Breiðdalsvík í jarðfræði og málvísindum. Rannsóknasetrið var formlega stofnað 1. maí 2021 og þar starfa nú tveir jarðfræðingar í fullu starfi. Stefnt er að ráðningu sérfræðings í málvísindum við fyrsta tækifæri. Þá hefur Breiðdalssetur tekið þátt í uppbyggingu Borkjarnasafns Náttúrufræðistofnunar Íslands á Breiðdalsvík.

Stefnt er að frekari uppbyggingu í samstarfi við Rannsóknasetrið á næstu árum. M.a. að byggja upp aðstöðu og taka á móti erlendum og innlendum nemendum í greinum sem tengjast starfseminni og mun styrkféð nýtast til þess.