Fréttir

Ársskýrsla Byggðastofnunar fyrir árið 2023 var gefin út samhliða ársfundi stofnunarinnar sem haldinn var í Bolungarvík 17. apríl síðastliðinn. Í skýrslunni er farið yfir helstu áhersluþætti í starfi Byggðastofnunar yfir starfsárið og skýrsla stjórnar og ársreikningar lagðir fram.

Meðal þess sem kemur fram í ársskýrslunni er umfjöllun um fundaröð sem fyrirtækjasvið stofnunarinnar stóð fyrir ásamt HMS, Samtökum Iðnaðarins, Lóunni og landshlutasamtökunum. Alls voru haldnir átta fundir víðsvegar um landið þar sem fundarefnið var atvinnuuppbygging og þróun íbúðamarkaðar. Vel var mætt á fundina en ljóst er að bæði tækifæri og áskoranir eru fjölbreytt víða um land. Á fundunum kynntu starfsmenn Byggðastofnunar þá lánaflokka sem nýst geta til uppbyggingar í landsbyggðunum en fram kom hjá fundargestum að lánastarfsemi stofnunarinnar er gífurlega mikilvæg til uppbyggingar á atvinnustarfsemi í öllum landshlutum.

Í ársskýrslunni er einnig stiklað á stóru varðandi afmælismálþing Brothættra byggða og Byggðaráðstefnuna en báðir viðburðir þóttust takast vel.

Meðal annarra nýjunga sem finna má í skýrslunni má nefna umfjöllun um náms- og kynnisferð fulltrúa Byggðastofnunar og landshlutasamtakanna til Noregs, leiðbeiningar um gerð þjónustustefnu sveitarfélaga og vinnustofur í þátttökubyggðarlögum um aðlögun íslenskra sveitarfélaga að áhrifum loftslagsbreytinga, og er þá ekki allt upp talið.

Fyrir áhugasama má finna ársskýrslu Byggðastofnunar fyrir árið 2023 hér.

Líkt og í fyrra kemur skýrslan eingöngu út á rafrænu formi sem er liður í Grænum skrefum stofnunarinnar.