Fréttir

Frá íbúafundi á Raufarhöfn 12. janúar

Verkefnið Raufarhöfn og framtíðin var fyrsta verkefnið í Brothættum byggðum og varð fyrirmynd verkefnisins á landsvísu. Það hófst á Raufarhöfn árið 2012 og íbúaþing var haldið í janúar 2013. Þar sem nú er komið  á sjötta ár frá upphafi verkefnisins er tímabært fyrir Byggðastofnun að stíga út úr verkefninu, samkvæmt verklagi stofnunarinnar fyrir verkefnið Brothættar byggðir.

Raufarhöfn var við upphaf verkefnisins verst setta byggðarlag landsins með tilliti til meðal annars fækkunar íbúa um rúm 51% á 14 árum, breytinga á aldurssamsetningu og fleiri þátta sem Byggðastofnun hefur skilgreint sem mælikvarða á stöðu byggðarlaga. Byggðin á Raufarhöfn er enn í varnarbaráttu en í dag trónir hún ekki efst á umræddum mælikvörðum.

Framtíðarsýn fyrir Raufarhöfn samkvæmt verkefnisáætlun er þessi: Raufarhöfn er þorp sem er byggt á tveimur megin atvinnugreinum, sjávarútvegi og ferðaþjónustu. Sérstaða þess verði jafnframt nýtt til þess að laða að frekari fjölbreytni  í atvinnustarfsemi sem höfðar til yngra fólks með fjölþætta menntun og bakgrunn. Þorpinu er vel viðhaldið, húsnæði í góðu ásigkomulagi og grunnmenntun og þjónusta  í boði.

Framtíðarsýnin hefur ekki ræst að fullu en tekin hafa verið markviss skref í þá átt. Sem dæmi er Raufarhöfn með samning við Byggðastofnun um aflaheimildir, styrkur frá Framkvæmdasjóði ferðamannastaða hefur þokað Heimskautsgerðinu vel áfram í samstarfi við Norðurþing, fjölmörg hús hafa verið lagfærð í átaki húseigenda er Orkusjóður styrkti og félagsstarf íbúa hefur eflst. Unnið er að merkingum á Raufarhöfn og öðrum spennandi verkefnum. Einnig má nefna afar spennandi verkefni sem er Rannsóknastöðin Rif og það erlenda samstarfsnet rannsóknastöðva sem hún tengist. Þá er ótalinn einn helsti ávinningurinn, sem er vaxandi trú heimamanna á framtíð samfélagsins og ýmis háttar framtak einkaaðila í atvinnu- og mannlífi án beinnar aðkomu verkefnisins.

Silja Jóhannesdóttir, verkefnisstjóri í verkefninu Raufarhöfn og framtíðin lætur nú af störfum í verkefninu Brothættum byggðum eftir kraftmikið og gott starf. Norðurþing, í samstarfi við Atvinnuþróunarfélag Þingeyinga, mun halda áfram varnar- og uppbyggingarstarfi á Raufarhöfn í samstarfi við íbúa og ráðinn verður starfsmaður til að fylgja málum eftir. Stjórnvöld og stofnanir þurfa engu að síður í athöfnum sínum og ákvörðunum áfram að taka sérstakt tillit til byggðaáhrifa á Raufarhöfn líkt og í þeim byggðarlögum sem áfram verða þátttakendur í Brothættum byggðum. Framtíð þessara byggðarlaga ræðst ekki síst af því að allir leggist á eitt um að snúa vörn í sókn.

Byggðastofnun vill að síðustu þakka Silju, verkefnisstjórnarfulltrúum, Norðurþingi, Atvinnuþróunarfélagi, Eyþingi og síðast en ekki síst, íbúum á Raufarhöfn, fyrir samstarfið í verkefninu.