Fréttir

Alls bárust 16 umsóknir um 1.800 þorskígildistonna aflaheimildir sem Alþingi fól Byggðastofnun að úthluta  til að styðja byggðarlög  í alvarlegum og bráðum vanda vegna samdráttar í sjávarútvegi.

Byggðastofnun auglýsti eftir samstarfsaðilum um nýtingu viðbótaraflaheimildanna  og rann frestur til að skila umsóknum út á hádegi, mánudaginn 7. október sl. 

Markmið verkefnisins er að auka byggðafestu í þeim sjávarbyggðum sem standa frammi fyrir alvarlegum og bráðum vanda vegna skorts á aflaheimildum eða óstöðugleika í sjávarútvegi, eru háðastar sjávarútvegi og eiga minnsta möguleika á annarri atvinnuuppbyggingu og eru fámennar, fjarri stærri byggðakjörnum og utan fjölbreyttra vinnusóknarsvæða.

Í því skyni var stefnt að uppbyggingu í sjávarútvegi sem:

• skapaði eða viðhéldi sem flestum heilsársstörfum fyrir bæði konur og karla við veiðar, vinnslu og afleidda starfsemi í viðkomandi sjávarbyggðum,
• stuðlaði að sem öflugastri starfsemi í sjávarútvegi til lengri tíma og drægi sem mest úr óvissu um framtíð sjávarbyggðanna.

Farið var yfir innkomnar umsóknir á fundi stjórnar Byggðastofnunar 9. október sl. og er stefnt að því að niðurstaða verði kominn í byrjun nóvember.

Nánari upplýsingar gefur Sigurður Árnason, sérfræðingur á þróunarsviði Byggðastofnunar í síma 455 5400 eða á netfangið sigurdur@byggdastofnun.is