Fréttir

Þann 10. janúar s.l. sátu fulltrúar stofnunarinnar opnunarfund Háskóla-, iðnaðar og nýsköpunarráðuneytisins á InvestEU samkomulagi Evrópusambandsins, en um er að ræða ábyrgðasjóð sem getur m.a. stutt við fjárfestingar í dreifðum byggðum.

Þátttaka Íslands í InvestEU áætlun Evrópusamstarfsins gefur fyrirheit um stórauknar fjárfestingar í nýsköpun, stafrænni væðingu og grænum lausnum hér á landi.

Samkomulag sem þetta er þó stofnuninni ekki ókunnugt því árið 2020 var undirritað samkomulag á milli Byggðastofnunar og European Investment Fund (EIF) um aðild að svokölluðu COSME (Competetiveness of Small and Medium Enterprises) samkomulagi, en um er að ræða ábyrgðasamkomulag á hluta af lánveitingum stofnunarinnar.  Samkomulagið gerði stofnuninni kleift að setja á laggirnar nýja lánaflokka sem reynst hafa sérstaklega eftirsóttir og stuðlað að aukinni atvinnuuppbyggingu víða um land.  Helst má þar nefna sérstakan lánaflokk til kynslóðaskipta í landbúnaði, lán til verkefna sem stuðla að umhverfisvernd og nýsköpunarlán.

COSME samkomulagið rann sitt skeið nú um áramótin en viðræður eru hafnar við EIF um aðild að þessu nýja ábyrgðasamkomulagi.  Gangi þær viðræður eftir nú í vor má vænta þess að stofnunin geti áfram boðið uppá þá nýju lánaflokka sem fyrra samkomulagið leyfði auk þess að opna mögulega á nýja lánamöguleika.