Fréttir

Byggðastofnun hefur, í samræmi við 15. gr. laga um póstþjónustu nr. 98/2019, tekið ákvörðun um breytingu á póstnúmeraskrá þannig að póstnúmerið 276 verði eftirleiðis ritað ,,276 Kjós" í stað ,,276 Mosfellsbær”.

Póstnúmerakerfið á Íslandi var búið til í sérstökum tilgangi (að tryggja dreifingu á pósti) og sérhver önnur notkun á póstnúmerum er á ábyrgð þess aðila sem notar póstnúmer til einhvers konar aðgreiningar í sinni þjónustu. Því er mikilvægt að breytingar á kerfinu séu ekki gerðar nema í samráði við alþjónustuveitanda í póstþjónustu sem er Íslandspóstur ohf., auk Þjóðskrár Íslands. Erindi Kjósarhrepps þessa efnis hefur því verið til umfjöllunar hjá Byggðastofnun og Íslandspósti ohf.

Nú hefur náðst sameiginleg niðurstaða um að fallast á beiðni Kjósarhrepps og tekur breytingin gildi þegar í stað. Einungis póstrekendur, sveitarfélög og opinberir aðilar geta gert kröfu um að póstnúmerum eða landfræðilegri þekju póstnúmera sé breytt og Byggðastofnun fjallar um nauðsynlegar breytingar á póstnúmeraskrá nokkrum sinnum á ári.

Sjá nánar um ákvörðun Á-2/2024

Almenna umfjöllun um póstnúmer má finna hér

Kort af afmörkun póstnúmera á landsvísu má finna hér