Fréttir

Byggðastofnun verður með vinnustofu fyrir atvinnuráðgjafa landshlutasamtakanna í landsbyggðunum þessa viku í höfuðstöðvum sínum á Sauðárkróki. Markmiðið er að efla tengsl á milli atvinnuráðgjafa og lánasérfræðinga stofnunarinnar og stuðla þannig að betri þjónustu um land allt. 

Landshlutasamtökin sinna mikilvægu hlutverki atvinnuráðgjafar í landsbyggðunum en Byggðastofnun ráðstafar fjármagni af fjárlagaliðnum ,,Atvinnuráðgjöf á landsbyggðinni” til þeirra. Núverandi samningur um atvinnuráðgjöf gildir frá árinu 2023-2027. Markmið samningsins er m.a. að efla og styðja atvinnulíf og nýsköpun í byggðum landsins með árangursríkri og skilvirkri atvinnuráðgjöf og stuðningi á grunni svæðisbundinna styrkleika. 

Á vinnustofunni verður samstarfið rýnt, farið vel yfir fjármögnunarstarfsemi Byggðastofnunar, atvinnuráðgjafar landshlutasamtakanna sjö veita innsýn í sína vinnu, Ráðgjafamiðstöð landsbúnaðarins kynnir sína ráðgjöf auk þess sem viðskiptavinir segja frá sinni reynslu.

Í lögum um Byggðastofnun er kveðið á um að stofnunin skipuleggi og vinni að ráðgjöf við atvinnuvegi í landsbyggðunum í samstarfi við landshlutasamtökin, sveitarfélög og aðra. Stofnunin skal gera samninga við atvinnuþróunarfélög, stofnanir, sveitarfélög, sjálfstætt starfandi ráðgjafa eða aðra, um að annast atvinnuráðgjöf á tilteknu sviði, atvinnugrein eða landsvæði. Í því skyni hefur Byggðastofnun gert samninga við öll sjö landshlutasamtökin í landsbyggðunum;  Austurbrú, Heklan (SSS), SASS, SSNE, SSNV, SSV og  Vestfjarðastofa.