Fréttir

Sigurður Ingi Jóhannsson, innviðaráðherra, hefur staðfest tillögur valnefndar um verkefnastyrki sem veittir eru á grundvelli stefnumótandi byggðaáætlunar fyrir árin 2022-2036. Að þessu sinni var úthlutað sautján milljónum kr. til verslana í dreifbýli fyrir árið 2025.

Markmiðið er að styðja við rekstur dagvöruverslana í minni byggðarlögum fjarri stórum byggðakjörnum á fámennum markaðssvæðum til að viðhalda mikilvægri grunnþjónustu. Samtals bárust sex umsóknir.

Verkefnin sem hljóta styrk að þessu sinni eru:

• Bakka-Búðin ehf., Reykhólum, rekstrarstyrkur, 5 m.kr.
• Verzlunarfjelag Árneshrepps, rekstrarstyrkur, 3 m.kr.
• Hríseyjarbúðin, styrkur til endurbóta og sjálfvirknivæðingar, 2,5 m.kr.
• North East Travel ehf, Bakkafirði, rekstrarstyrkur, 1,5 m.kr.
• Gunnubúð ehf., Raufarhöfn, styrkur til endurbóta, 3 m.kr.
• Verslunarfélag Drangsness, rekstrarstyrkur, 2 m.kr.

Þriggja manna valnefnd fór yfir umsóknirnar og gerði tillögur til ráðherra. Í valnefnd sátu þau Elín Gróa Karlsdóttir, verkefnisstjóri hjá Ferðamálastofu, Sigurður Árnason, sérfræðingur á Byggðastofnun, sem jafnframt er formaður og Snorri Björn Sigurðsson fyrrverandi forstöðumaður þróunarsviðs Byggðastofnunar. Með valnefnd starfaði Sigríður K. Þorgrímsdóttir sérfræðingur hjá Byggðastofnun. Skipun valnefndar og mat umsókna voru í samræmi við reglur um úthlutun innviðaráðherra á framlögum sem veitt eru á grundvelli stefnumótandi byggðaáætlunar fyrir árin 2022-2036.