Fréttir

Ásdís Hlökk Theodórsdóttir

Ásdís Hlökk Thedórsdóttir aðjunkt og doktorsnemi við Háskóla Íslands og fyrrverandi forstjóri Skipulagsstofnunar, kynnti niðurstöður könnunar sem er hluti þverfræðilegrar rannsóknar sem hún vinnur að sem PhD verkefni í opinberri stjórnsýslu við Stjórnmálafræðideid HÍ, á ársfundi Byggðastofnunar í Bolungarvík í síðustu viku. Ásdís Hlökk fékk í fyrra styrk úr Byggðarannsóknarsjóði til að vinna að þessari rannsókn.

Í könnuninni var m.a. spurt um starfsumhverfi skipulagsstarfsfólks sveitarfélaga, áherslur sveitarfélaga í skipulagsmálum, þekkingu og færni í skipulagsmálum, áhrif ólíkra hópa á skipulagsmál sveitarfélaga og einnig þrýsting ólíkra aðila á skipulagsmál sveitarfélaga.

Fámenn stjórnsýsla og mikil starfsmannavelta benda til þess að takmarkað stjórnsýslulegt bolmagn sé hjá meirihluta íslenskra sveitarfélaga. Starfsreynsla sveitarstjóra og skipulagsstarfsfólks sveitarfélaga og árafjöldi sveitarstjórnarfólks í nefndarsetu er í meirihluta tilfella innan við fimm ár. Reynsla sjálfstætt starfandi skipulagsráðgjafa er hins vegar í meirihluta tilfella lengri en 14 ár. Fram kom einnig að talsverður munur er á menntunarstigi kjörinna fulltrúa og skipulagsstarfsfólks sveitarfélaganna og skipulagsráðgjafa sem sinna ráðgjöf til sveitarfélaga. Þá kemur fram að margir í hópi skipulagsstarfsfólks og skipulagsráðgjafa segjast  þekkja dæmi um að frændsemi, kunningsskapur eða pólitísk fyrirgreiðsla hafi haft áhrif á skipulagsákvarðanir sveitarfélaga.

Sveitarfélög gegna lykilhlutverki við stefnumótun í skipulagsmálum og framkvæmd þeirra. Skipulagsgerð og ákvarðanataka í skipulagsmálum er pólitísk stefnumótun og ákvarðanataka sem krefst vandaðs faglegs undirbúnings og fjölbreyttrar þekkingar og hæfni.

Byggðarannsóknarsjóður var settur á laggirnar 2014 og hefur verið veitt úr honum 41 styrkur, tíu ár í röð, alls tæpar 90 milljónir. Tilgangur sjóðsins er að efla byggðarannsóknir og bæta þekkingargrunn fyrir stefnumótun og aðgerðir í byggðamálum. Byggðastofnun fer með umsýslu sjóðsins. Byggðarannsóknasjóður | Byggðastofnun (byggdastofnun.is)